Nunanut allanut unammisartut sungiusaasuisa meeqqat inuusuttullu innarluutillit timersortarnerat maluginiaqqugaat

Qanittukkut isikkamik arsaalluni naapinneq peqataasunut puigorallagassaassanngitsoq ilimagissallugu pissutissaqarpoq. Tassami isikkamik arsaallutik nunanut allanut unammisartut sungiusaasui marluk peqataapput, tassalu danskit angutit nunanut allanut unammisartuisa sungiusaasuat Kasper Hjulmann aammalu sungiusaasoqataa, Kalaallit Nunarput sinnerlugu angutit nunanut allanut unammisartut sungiusaasuat Morten Rutkjær, inuusuttut innarluutillit nunanit tamalaaneersut naapinneranni CP-arsaannermi peqataaqataapput.

Arn Hynne Nielsen nunatsinneersoq naapinnermi peqataavoq:

- Arn, Kalaallit Nunaannut nooqqinnissarput sioqqullugu CP-fodbold-imi peqataasarpoq iluanaarlutalu klubbia attavigiinnarnikuuarput nooreeraluarluta, ilaatigut nunatsinni taamatut innarluutillit timersornissaminnut assingusumik periarfissaqanngimmata. Taamaammat Arn assut nuannaarpoq naapinnermi tassani periarfissinneqarami peqataanissaminut, tassanilu nunanut allanut unammisartut sungiusaasui marluk peqataapput, ilaatigut innarluutillit timersortarnissaminnut periarfissaqarnissaat pingaaruteqartuusoq pillugu maluginninniaqqusillutik, Arn-ip anaanaa, Anja Hynne Nielsen, Sermitsiaq.AG-mut oqaluttuarpoq.

Naapinneq inuusuttunit nunanit tamalaaneersunit peqataaffigineqartoq Danmarkimi pisoq siullermeerutaavoq, tassani peqataapput arnat angutillu innarluutillut inuusuttut 100-it missaanik amerlassusillit, Tuluit Nunaanniit, Irland-imiit, Norgemiit aammalu Kalaallit Nunatsinniit peqataasoqarluni.

Kalaallit Nunaanni Timersoqatigiit Kattuffiat attavigilluarneqarpoq

Anja Hynne Nielsen, aamma nunatsinni innarluutillit oqaaseqartartorivaat, taannalu nuannaarlunilu tulluusimaarpoq naapinnermi nunarput sinniisoqarmat, taassumami pingaartippaa erseqqissaatigissallugu innarluutillit allatulli timersornissamut periarfissaqartinneqarnissaat:

- Innarluutillit oqaaseqartartoqarfiannit Kalaallit Nunaanni Timersoqatigiit Kattuffiat attavigilluarparput, aammalu Nunatsinni innarluutillit timersornissaminnut periarfissarissaarnerunissaat pillugu aqqutissiuusserusunneq iluarisimaarparput. Assut qilanaarpunga Naalagaaffiit Peqatigiiffiata innarluutillit pillugit aalajangersagaanni immikkoortoq 30 naapertorlugu anguniakkat aamma nunatsinni malinneqalernissaanut, tassalu kikkut tamarmik timersornermut, kulturimut aammalu sunngiffimmi sammisassanut periarfissaqartinneqartariaqartut.

Nunanut allanut unammisartut sungiusaasuat Rutkjær ikiuukkusuppoq

- Uani sapaatip akunnerata naanerani iluanaarlunga CP-arsaannermut qaaqqusaavunga, taanna nunat tamalaaneersut inuusuttut innarluutillit naapinnerivaat kalaallimit peqataaffigineqartoq Københavnimilu ingerlanneqartoq.

- Meeqqat aalassorissutsimikkut innarluuteqartut CP-qartut allatullu aalassorissutsimikkut innarluuteqartut, isikkamik arsaakkiarfissaaleqisarput, aamma Kalaallit Nunaanni. Tamanna allanngueqataaffigerisuppara, ukiunilu tulliuttuni nunanut allanut unammisartut sungiusaasuattut atuunninni sulissutigissavara. Taamaammat naapinnerat orniguffigaara, damskit nunanut allanut unammisartut sungiusaasuat Kasper Hjulmand peqatigalugu, taamaaliorpugut tapersersuilluta aammalu isumassarsiorluta inuit CP-mik innarluutillit isikkamik arsaannissaminnut periarfissarissaarnerunissaat tapersersorusukkatsigu.

- Inuusuttut 100-it Tuluit Nunaanneersut, Irlandimeersut, Kalaallit Nunaanneersoq aammalu Danmarkimeersut peqataapput KB-ip Købehanvnimi arsaattarfiini sungiusarlutik unammiuaarlutillu. Misigisaq annertooq aammalu uannut isumassarsiffiulluartoq! Isikkamik arsaannerup inuit katersuutsittarpai - aamma isikkamik arsaanneq inunnut tamanoorpoq, Kalaallit angutit isikkamik arsaallutik nunanut allanut unammisartut sungiusaasuat Morten Rutkjær oqarpoq.

Kasper Hjulmand naapinneq pillugu videoliami uani takujuk (danskisuujuvoq):