Nunarput Frankrigimi ajorsarpoq
Nunatta angutit assammik arsartartui Frankrigimi ligami arsartartut pitsaanerpaat ilaat pingasunngornermi unnukkut sungiusaatigalugu unammigamikkit naligiipajaarput. Inerneri aamma kikkut isertitsinersut takukkit.
Akiuulluaraluarlutik franskinut St. Raphaelimut Nunarput ajorsarpoq 30-31-mik siullermi sungiusaataa unamminermi.
Kalaallit nunatta assammik arsartartui - maannakkorpiaq Frankrigimi Nicemi sungiusartut Amerikap Nunavittaani pissartanngorniunnissamut piareersarlutik - ippassaq misiligutaa siullerpaamik unammipput. St. Raphael unammivaat - normu fiiaraasut qanittukkut naammassisumi Frankrigimi unammisaqattaarnerni.
Unamminerlu Nunatta sunniuteqataaffigilluarpaa. Naak ajorsaraluarlutik 30-31-mik unamminermi pitsaasunik ataasiakkaanik arsarluarfiuvoq, tassa tamarmik misigimmata piffissami sivikitsuinnarmi angusaqartoqarluartoq. Unammineq tamangajaat holdit taakku ingiaqatigiipput, unillatsiarnermilu St. Raphael 16-15-imik siuaqqavoq.
Minik Dahl Høegh unammilluaqaaq, takutippaalu arsarluarnerpaaffissani nallersimallugu. Unamminermi Minik 12-nik isertitsivoq. Målmandiat inuusuttoq, Inuk Højgaard, aamma unammilluavippoq annaassisaqattaarluarporlu. Nunatta arsartartuini målmandissatut piukkunnaqaaq taamaattunngorartarsinnaallunilu.
Ataatsimut unammineq isigalugu - kalaallit unammisartut siuariartuinnavittutut oqaatigineqarsinnaapput. Franskit assammik arsaattartui pitsaanerpaanut ilaasut naligipajaarmatigit tamatuma takutippaa ullumikkut qanoq pikkoritsigilersimanerat. Ullumikkut Nunarput unammeqqissaaq - massakkut franskini rækkeni pitsaanerpaat tullianneersunut.
Unamminermi isertitsisut:
Nunatsinniit: Minik Dahl Høegh 12, Miilu Rosing 7, Jakob Larsen 3, Rasmus Larsen, Danny Brandt, og Hans Peter Motzfeldt, tamarmik 2, Miki Heilmann aamma Aqqaluk Sørensen tamarmik ataatsimik isertitsisut.
St. Raphael'ip isertitsinerpaasuit: Nicolas Kraujuwik, Adrien Claire aamma Jarosan Zemarik tamarmik 5-nik isertitsisut.
Isiginnaartut: 400