Nunatta Danmark DM-imi uppisippaa

Martin Mølleri Nuummi NSP-meersoq, kilometeri ataaseq sinnerlugu sukkasuumik arpannermi sekundinik qulinik malinnitsiminik siulliugami unammisani inissippai, naalagaaffimmilu ujakkaartartuni sukkanersaalluni takutippaa.

Danmarkimi ujakkaarluni pissartanngorniunnermi tamanna pivoq, taanna uani sapaatip-akunnerani Kvitåtvatnimi Norgemi ingerlanneqarpoq.

Martin Mølleri aamma tassani 15 kilometerimut arpannermi ajugaavoq.

Ullormi sukkasuumik arpalluni unammiffiusumi Karl-Peter Kristensen (ASP) ajugaasup tulleraa, taamatullu qularnaatsumik malitsiminik qallunaanit siulliuvoq.

Ilaalluartut
Angutit finalerneranni Kalaallit Nunaat peqataatitaqarluarpoq, tassami Frederik Petersen (ISP) (ajugaasut sisamaat) aamma Nukappiannguaq Olsen (SSP) semifinalemit finalernissamut ingerlaqqipput.

Nukappiannguaq Olsen taassuma saniatigut juniorini angusarissaarnersaavoq, H19-imilu forbundsmesteritut taasinnaanngorluni.

Hannah Olsen (ISP) arnat arpanneranni aamma finalemut annguppoq, tassanilu Danmarkimi pissartanngorniunnermi ajugaasut sisamaattut inissilluni. Hannah aamma juniorini arpattartuuvoq, tassanilu ajugaagami D17-imi forbundsmesteritut taasinnaanngorpoq.

Ajaappiaq napisoq
Bjarne Hansen (SSP) pissartanngorniunnermi finalemut anngutinngilaq, B-finalemili ajugaavoq, M15-imilu sukkanerpaagami forbundsmesterinngorpoq.

Minik Nikodemussen (KS-69) B-finalemut annguppoq, kisianni orlugami ajaappiani napivaa, taamaalillunilu B-finalemi kingullersaalluni apuuppoq, kisianni H15-imi sisamaattut inissippoq. Noah Mikael Noahsen (SSP) C-finalemi arpappoq, H19-imilu kingullersaalluni. Aka Olsen (SSP) semifinalemut annguppoq, C-finalemilu arpassinnaanngorluni, arpanniaranili aalajangerpoq.

Atuaruk: Martin Møller sapersaatiginagu Danmarkimi pissartanngorpoq