Nunatta Kujataata marathonimut arpattartui
Aappariit timersortartut Charlotte aamma Vilhelm Rasmussenikkut Qaqortumeersut sapaatiummat Copenhagen Marathonimi siullerpaamik asfaltikkut arpallutik apuupput.
Aappariit taamak isorartutigisimut siusinnerusukkut marathonernikuupput, kalaallit nunaata kujataani unammisitsinermi GAR-imi - Greenland Adventure Race - qaqqat qaavisigut tatsillu sinaatigut arpassimallutik. København Marathon 2008-mut atatillugu nukissaqarluarnertik kusanavissumillu arpassinnaanertik takutippaat. Vilhelm Rasmussenip 57-inik ukiullip 3 tiimit 30 minutsillu atorsimavai, charlotte Rasmussenip 52-inik ukiullip 5 tiimit 15 minutsillu atorsimallugit. Charlotte Rasmussenip Qaqortup Kommuneata erfalasua apuuffikkut appakaakkami nassarpaa, aammalu isiginnaartunit kalaallinit "K-33"-mik suaartaanneqarluni. Qaqortumik klubbi K-33 ukioq manna ukiunik 75-iliilluni naliuttorsiorpoq.
Marluullutik arpaffik tamaat arpakkamikku nuannaarutigeqaat maannalu aasap ingerlaneranni arpatsitsinissanut assigiinngitsunut ukioq mannalu Greenland Adventure Race-imut september/oktoberimi pisussamut peqataanissaminnut qilanaarlutik.