Nuugaatsiami Illorsuarnilu isikkamik arsarnermik ilinniarfik

Nunaqarfiit taakku marluk ataatsimoorutigaat Uummannap illuaqarfianiit ungasingaatsiaramik aammalu nunaqarfinni taakkunani innuttaasut 90-it missaanniimmata. Atsiortup misigivaa nunaqarfiit qaqqarsuarnit portusuunit takorannersunillu avatangerneqarsimallutik nunami manissukajaami kusanartumi inissisimanerisa saniatigut sumiiffigisimasanni allanut sanilliullugu ivigaqarnerujussuusoq.

Nuussuarmi meeqqat 14-it peqataapput, Gaaba Mølleri sungiusaasumut ikiortigalugu eqinnaatsoq. Illorsuarmi meeqqat 25-it peqataapput, tassanilu Erik Møller, Aqqaluk Tobiassen aamma Isak Løvstrøm ikiuuttuupput.

Pingaartumik Illorsuarni sapaatikkut unnukkut tikitanni GBU-p Coca-Cola arsarnermik ilinniarfianut ingerlatsinissannut piukkunnartoqarnersoq nalornissutigaara, taamaattumik ataasinngornermi ullaaralaakkut arsaaffissamut piukkunnartunik nassaarniarniarlunga angalaarpunga. Piukkunnartut marluk naammagittalaarluni atorneqarsinnaasut nassaaraakka.

Kisianni ullaap-tungaa ingerlasoq nunaqarfimmi attaveqaat Erik Mølleri takkuppoq, taassumalu oqaatsinik ussersuutinillu nassuiaanniarsaraanga arsaattarfik avannamut ungasinnerusumiittoq - ajunngilarmi isumaminik, eqqarsarpunga. Kisianni ullup qeqqa qaangeraa illoqarfik qimallugu ingerlavugut, minutsillu 25-t missaat ingerlareerluta arsaattarfik tikipparput, kalaallit nunaanni pissutsit eqqaassagaanni isikkamik arsarnermik ilinniartitsinissamut piukkunnartoq. Arsaaffik uingaalaaraluarpoq, kisianni manippoq sioqqallu manngerlutik arsarfigineqarsinnaallutik, meeqqallu arsamik malersueqattaartillutik annerpallaarneq ajorput.

Nunaqarfiit anginngitsunnguugaluarput, kisianni meeqqani, sungiusaasumut ikiortini nunaqqataasunilu allani akuoorusussuseq nuannaarnerlu sumiiffigisimasanni allanitulli ippoq.

Aaqqissuussinermut tamatumunnga tapersersuisimasunut tamanut qujanarsuaq.

Ataatsigut atsiortunga Uummannap kommuneani nunaqarfiini arfineq-marluusuni arfinillit tikeraarsinnaasimagakkit qujamasuutigaara, tassanilu GBU-p 2008-mi Coca-Cola arsarnermik ilinniarfiup pilersaarusiorneranut, aaqqissuunneranut piviusunngortinneranullu ikiuussinnaasimagama, immikkullu siunissamut eqqaamajuassavakka:

· Isikkamik arsarnermik ilinniarfiup atortuutaat puuiarneqaraangata arsarnissamullu piareersarneqaraangata meeqqat assaararsui amerlaqisut ikiuukkusuttaqisullu aammalu isit qilanaartut.

· Isikkamik arsarnermik ilinniartitsineq naammassingajaleraangat ingerlaqqittussanngortungalu nalunngikkaangamikku meeqqat isaat apeqqutissaqarpasissut - qanormi målit, nassarniarnerpakka. Paasigaangamikkulu målit nunaqarfimmiiginniarniartut nuannaarneq angisaqaaq, nunaqarfimmi målinut marlunnut arsarnissamik periarfissaqalersoq paasigaangamikku.

· Niviarsiaqqap Uummannap illoqarfiani qungujulalluni naapigiarlunga tujuuluni sungiusarnermi atortoq siitsippaa iluani T-shirti GBU-p Coca-Cola arsarnermik ilinniarfiata ilisarnaataanik ilisarnaatilik takutippaa, immitsinnut ilassivugut, nuannaarlunilu illalaarluni ingerlaqqilluni.

· Imaluunniit nukappiaraq Ukkusissani Nuugaatsiamilu ilaasinnaanerminut angumersisoq - taassuma arlaleriarluni pinnguaatit arsarnerillu assigiinngisut qanoq ingerlanneqarnissaannik takutsitsisartuunissaminik tulluusimaartoq usorsisimaartigisorlu misigalugu.

· Ukkusissaniit kangerlummut angalaneq, ujarappassuit aqqusaarlugit - taava 2-3 tiimit missaanni arsamik arsarneq arsamillu pinnguarneq, meeqqallu inersimasullu, angallapput uterluni tassani immap killingani unnukkorsiorneq.

· Nuugaatsiami arsaq nukappiarannguamut arsanik sinneruttunik tigusinialeraangat anaanaminit arlaleriarluni aaneqartarsimasumut naloriukkakku isiginnaartut nuannaarnerat.

Kiisalu misigisat arlallit nuannersut - ataatsimut isigalugit meeqqanut "iliuuseqarsimanermik" ataatigut atsiortup misigisaqarneranut peqataasimasut, isit "qujamasunnermik" takutitsisorpassuit suliniarnerumut imminermut imminut akilertutut ikkaat.