Nuummi naluttartut arlalinnik ujaminnattut
Inuusuttut naluttartut Nuummeersut ukioq manna Reykjavikimi nunat tamalaat unammiuaarneranni ujaminnapput.
Naluttartut, aqutsisut sungiusaasullu 21-t Nuummi Naluttartut Klubbianeersut Islandimi nunanilu allani klubbit allat 34-t peqatigalugit Reykjavik International Gamesimi januaarip 26-aniit 28-anut peqataapput.
- Meeqqanik siullermeerlutik peqataasuuteqarluarpugut, nalunnguarujussuanngikkaluarlutik kisianni sungiusarnermut unammiuaarnernullu peqataaneq misilinniassammassuk. Inersimasunik naluttartoqanngimmat inuusuttut unammineri kisiisa peqataaffigisarpavut, sungiusaasoq Jonas Tetzschner Nuuk Ugeavisimi allappoq.
Arnannguaq Thiessen, Alex Glistrup aamma Nuka V. Petersen sungiusaasunut ikiortaapput, Line Danielsen aamma Vivian Tetzschner iligiinnut aqutsisuullutik.
Angusaqarluartut
- Ullormi siullermiilli, tallimanngornermi januaarip 26-anni, ingerlalluaqaagut, sungiusaasoq Jonas Tetzschner oqaluttuarpoq.
Naluttartut ukioqatigiiaat Nuummi naluttartut peqatigiiffiannit peqataasut amerlanerupput.
Ukioqatigiiaat unamminerini Theodor Kronborg Hinnerup 50 meterimut nalunnguarnermi sølvinnappoq.
Tamatuma kingorna Adam Tetzschner 400 meterimut ataasiakkaarluni nalunnguarnermi bronzennappoq.
Taava Inuk Treur 50 meterimut nalunnguariaatsimi butterfly-rnermi bronzennappoq, kingulliullunilu Ronja Wraae Würtz 50 meterimut butterfly-rnermi sølvinnalluni.
- Siorna marlunnik ujaminnattoqarpugut. Ullormi siullermi sisamat ujaminnammata nalerisimaarnaqaaq, Jonas Tetzschner oqarpoq.
- Naluttartuvut sisamat tamanut ammasumi unammiuaarnernut ilannguteqqammerput. Pingaartumik Aila Sørensen aamma Victoria Tetzschner 50 meterimut butterflymut B-finalimut anngutingajalluinnarput. Aammattaaq inuusuttorpassuit 50 meterimut killeqanngitsumik naluttartut ilaapput. Naluttartut tamarmik angusarissaarluarput, sungiusaasoq oqaluttuarpoq.
Tamanut ammasumik unammiuaarnerit ukioqatigiinnut tamanoorput, inuusuttunut inersimasunullu.
Sungiusaasoq tulluusimaartoq
Ullup aappaani arfininngornermi januaarip 27-anni Nuummi naluttartut klubbia unamminerup immikkoortuata kingulliup ingerlanerani arlalinnik nalunnguartoqarluarpoq.
Tassani Adam Tetzschner 200 meterimut butterfly-rnermi sølvinnappoq.
Ronja Wraae Würtz aamma 100 meterimut butterly-rnermi sølvinnappoq.
Adam Tetzschner tamanut ammasumik unammiuaarnermi ajugaaniutivinnissamut annguppoq.
Niviarsiaqqani Aila Sørensen 100 meterimut butterfly-rnermi aamma angusarissaarpoq, isorartussutsimilu tamanut ammasumi B-finalimut annguppoq.
- Aila Nuummit niviarsiaqqani siullersaalluni B-finalimut annguppoq, tamannalu tulluusimaarutigeqaarput, sungiusaasoq oqarpoq.
Ualikkut unamminerup immikkoortuani kingullermi Aila Sørensen aamma Adam Tetzschner nalunnguartussanngorput.
200 meterimut butterly-rnermi ajugaaniutivinneq Adamimut misigisaavoq nuannerluinnartoq, sungiusaasoq ima oqaluttuarpoq:
- Adam unammillerpalaarluni aallartippoq, apuuffissaminullu apuulluarsimalluni. 2.41,85-imik piffissaq atorlugu nalunnguarpoq, ullaaq taanna Islandimiumit ajugaasumit sekundinik marlunnik sukkanerulluni.
Adam unamminermi tamanut ammasumi normu 7-inngorpoq. Aila 100 meterimut butterflymut B-finalimi peqataavoq. Tassani piffissaq 1.11,92 atoramiuk inuttut siuariaateqartorujussuuvoq. B-finalimi normu 5-inngorpoq, unammiuaarnermilu katillugit normu 13-inngorluni.
Inuttut angusat pitsaasut
Ullup pingajuani, sapaammi januaarip 28-anni, angusat pitsaanerit arlallit anguneqarput.
Adam Tetzschner ukiut tamaasa unamminerni 200 meterimut sakissamik nalunnguarnermi 100 meterimullu butterfly-rnermi bronzennappoq.
Ronja Wraae Würtz immikkut ittumik nalunnguaqqippoq, ukioqatigiiaanilu 200 meterimut butterfly-rnermi sølvinnalluni, inersimasullu A-finalernerani taartaasut tullersortaalluni.
- Ronja 2011-mi inunngorpoq, taamaattumik angusaqarluarpoq, sungiusaasoq oqarpoq nangillunilu:
- Ronja aamma aappaagu ukioqatigiiaani nalunnguartartoorusuppoq, ilimanarporlu ajugaaniutivinnermut anngutissasoq. Sungiusarfigisinnaasaminik naluttarfeqassappat.