Nuummi timersullammaat toqqarneqassapput
Ukiup timersullammai pisarnertut Kunngit Pingasuni toqqarneqassapput.
Kunngit Pingasut Ulluanni, januaarip 6-ianni timersornerup ullua Nuummi illorsuarmi timersortarfimmi nalliussineqassaaq.
Timersoqatigiiffiit kiisalu Nuummi innuttaasut timersornerup ulluata nalliussinissaannut peqataanissaannut kajumissaarneqarput. Timersornerup ulluata nalliussineqarnissaa nalunaaqutaq marluniit sisamat tungaanut ingerlanneqassaaq.
Ulloq taanna pisussat ima aaqqissuunneqarput:
Atuakkamik Timersornermik aamma Kalaallit Nunaanni, nunarsuaq tamakkerlugu, Europami, nunani avannarlerni kiisalu Danmarkimi pissartanngorsimasunut diplominik agguaaneq.
Timersullammammik toqqaaneq.
Aqutsisuullammammik toqqaaneq.
Sungiusaallammammik toqqaaneq.
Timersullaqqisumik toqqaaneq.
Ukiup holdianik toqqaaneq kiisalu kajumissaasiineq.
Pisarneq malillugu meeqqat orpiliartinneqassapput puusiaaqqanillu assigiinngitsunik imalinnik agguaavigineqassallutik.
Erinarsoqatigiit N.I.P.E kiisalu Nordisk Koncertkor juullisiutinik akunniliisassapput, ualerlu naggaserlugu pisarnertut qummoroortartoqassasoq, Kommuneqarfik Sermersuumi timersorneq pillugu siunnersortip Steffen Silassenip nalunaarutigaa.