OL-imut piariilerput
Miillaaraq Lennert aamma Uiloq Slettemark ooqattaajutigaluni sisoraatinik oqilaniunnermi World Cupimut aammalu Koreami VM-eqarnissaanut anngupput, taamaasillutillu 2010-mi Vancouverimi OL-eqarnissaanut annguteriaannaallutik.
Miillaaraq Lennert aamma Uiloq Slettemark Tysklandimi Altenbergimi IBU-cup-eqarnerani marluullutik ingerlalluartorujussuupput, World Cupimut aammalu VM-imut peqataanissamut piumasaqaatit nutaat sakkortuut naammassigamikkit. Tamanna peqatigalugu Dansk Olympiske Komitep, IOC-p aamma IBU-p 2010-mi Vancouverimi OL-eqarnissami anngunnissamut piumasaqaataat naammassivaat. OL-imulli anngutivissagunik anngunnissamut piumasaqaat ataasiarlutik angoqqittariaqarpaat.
Angusarissaarnerujussuartik pissutigalugu marluullutik World Cupimi aammalu februarip qiteqqunnerani Koreami VM-eqarnissaani peqataasinnaanngorput.
– VM-imut unammisartunik marlunnik peqataatitaqarluni Kalaallit Nunaat 2010-mi OL-imut arnamik peqataatitaqarnissaminut ilungersornermini siuariarujussuarpoq. Siorna Østersundimi VM-imi peqataatitaqannginnatta nations cupimi pointinik pissarsinissatsinnut periarfissarissaartorujussuuvugut maanna arnanik marlunnik VM-imut peqataatitaqartussanngoratta, Grønlands Biathlon Forbund tusagassiorfinnut nalunaarummini allappoq.
Uiloq Slettemark aamma Miillaaraq Lennert pallorluni nikorfallunilu ooqattaasarnermi marluullutik ataasiaannarlutik uniorput. Ajugaasoq Tysklandimeersoq Juliane Doll ataasiarluni uniorpoq, normu 2-ngortoq, Nathalia Sokolova, Ruslandimeersoq, normu 3-ngortorlu, Madara Liduma, Latviameersoq, marloriarlutik uniornermi pillaammik kaajallaasariaqarsimapput. Uiloq Slettemark nr. 48-unngorpoq, ajugaasumit 4,10 minutsinik kigaannerulluni, Miillaaraq Lennertilu peqataasunit 77-init nr. 53-inngorpoq, ajugaasumit 4,43 minutsinik kigaannerulluni.
Uiloq Slettemarkili Miillaaraq Lennertilu siullermeerlutik World Cupimut peqataanissaminnut periarfissaq atussanngilaat. Miillaaraq Lennert Sverigemi angerlarsimaffimminut Torsbymut angerlarsimavoq, Canadami Canmore-mi Inuusuttut VM-eqarnissaannut, januarip 24-ianni aallartittussamut piareersariartorluni, Uiloq Slettemarkilu Norgemut angerlarsimavoq qitornani napparsimasut, suliffini februarimilu Inersimasut VM-eqarnissaannut sungiusarnini paariartorlugit.