Østrigimut unammineq: Kukkuluttornerit akisunaarneqartut
Nunanut allanut unammisartut Stavangerimi eqimattakkaani unamminerat kingulleq Kalaallit Nunaannut periarfissaqarfiuneruvoq. Unamminerulli naalernerani kukkuluttortaarnerit kingunerannik Østrig isaatitsingaatsiarpoq.
Arnat assammik arsarlutik nunanut allanut unammisartut unammineq aallartillugu ilungersorluinnarput. Minutsimmi marluk ingerlasimariaannartut unammisut ilaat minutsini marlunni anigallartinneqarpoq, Østrigilu arsamik isertitsilluni. Kalaallit malinnaallutik isertitsipallakkaluartut, kalaallit ikinnerugallarnerat Østrigimit atorluarneqapallappoq.
Nunanut allanut unammisartut saassussisarneri siulliit arlallit Østrigip illersuisuinit anginerusunit unitsinneqartarput. Måliniittorlu ingisikkallarlugu sinaani isertitseriartussat marluutinneqarneri aamma iluatsivinngillat, minutsillu qulit unammereernermi kalaallit målinik tallimanik kinguaqqalerput.
Kalaallit sukataarnerusut
Unamminerup immikkoortua qiterpaartorlu målmandi ajoquserpoq taarserneqarlunilu. Kalaallit time-outillatsiareernerminni saassussisarnitik sakkortusivaat, isertitallu nikingassutaat pingasuinnanngortinneqarput. Unamminerup immikkoortua siulleq qiteqquttoq 10-13-imik Østrig siuaqqalerluni.
Nunanut allanut unammisartut sukariarneri Østrigip sukkanerusumik saassussisarnermik immikkoortup aappaani akivai, immikkoortorlu siulleq naammassimmat Østrig 13-20-mik siuaqqavoq.
Unamminerup aappaa aallartimmat kalaallit illersuinertik allanngortippaat aalanerulerlutik sukasimaarnerulerlutillu, Østrig kukkuluttortinneqartalerluni. Østrigimiulli isertitseriartarneri sakkortunerusut unitsikkuminaapput.
Nunanut allanut unammisartut ilungersortinneqaraluartut, kalaallit illersuisut nipitujuarput. Unamminerup naammassinissaanut minutsit 15-iinnanngortut kalaallit time-outeqqipput, isertitat Østrigimut 21-31-iusut.
Kukkuluttornerit isertitsissutaasut
Time-outereernermi kalaallit sukkanerusumik saassusseriartalerput, østrigimiullu saassussineri arlallit unitsinneqartalerlutik.
Unammisulli qasujartorneranni Østrig suli sukkanerusumik saassussisalerpoq, nunanut allanut unammisartut kukkuluttortinneqartalerlutik. Isertitseriarnerit arlallit unitsinneqarput, Østrigimiullu utaqqilluartarnermigut iserteriakkatik arlallit iluatsippaat, naak målmandip isertinneqariartut ilaat aamma unitsittaraluarai.
Østrigimut unammineq 23-43-mik inerneqarpoq.
Kalaallit Nunaannit arnat assammik arsarlutik nunanut allanut unammisartut Frederikshavnimi President's Cupimi unamminertik nangeqqissavaat.