Øystein tamatumuuna ingerlalluarneruvoq
Ooqattaasaatigaluni sisoraatinik oqilaniulluni ukioq manna unamminerit pingajussaanni kalaallit peqataasut utoqqartaat Øystein Slettemark kalaallini angusarissaarnersaavoq.
Italiami Martellimi unamminerit aappaanni 10 kilometerimut unammisoqarpoq marloriarluni ooqattaasartarluni. Øystein Slettemark unamminermi aallartilluarpoq ooqattaasarnermi siullermi ataasiaannarluni uniorluni, rundenilu siullerni marlunni oqilaniunnermi nr. 91-iusarlunilu 93-iusarami Øystein Slettemark naammaginartumik angusaqartussaarpasippoq.
Nikorfalluni ooqattaasarnermi unioqattaarpallaaqqippoq, sisamariarluni, pillaammillu kaajallaanerit qaangiummata Slettemark peqataasunit 170-init nr. 116-imut kinguarpoq. Rundemili kingullermi ingerlalluarami oqilaniunnermi nr. 69-iulluni 16-inik siuariarluni normu 100-unngorpoq.
- Juullertinnagu unammiuaartarnerit tamakkua pingaartippallaanngilakka, malugaarali qasusuilliartorlunga. Sisoraatikka ullumi pujannerpaajusimanngillat, isumaqarpungalu tamanna issutaasoq maani Martellimi unamminermit siullermit kigaannerusumik arpattarninnut. Ooqattaasarnikkut uppernarsarneqarpoq pallorlunga ooqattaasarnera naammaginartoq, nikorfallunili ooqattaasarnera iluarsisariaqariga, Grønlands Biathlon Forbundip tusagassiorfinnut nalunaarutaatigut Øysten Slettemark oqarpoq.
Unamminermi ajugaavoq russeq Andrei Makoveev, ataasiaannarluni uniorluni. Normu 2-ngorpoq aamma russeq, Artem Ushakov, ooqattaasarnermi uniunngivissoq. Sisoraatinik oqilaniuffimmi sukkanersaavoq norskeq Ronny Hafsaas, taannali nr. 16-iinnanngorpoq nikorfalluni ooqattaasarnermi sisamariarluni uniorami.
Kristian Kristoffersen 20 kilometerimut unamminermi angusarissaarluni nr. 65-inngorsimasoq tamatumuuna ingerlalluarpallaanngilaq. Kristian marloriarluni ooqattaasarnermi tamatigut marlunnik uniuisarpoq. Taamaasilluni Øysteinimit ataasimik uniuinikinnerulluni. Oqilaniuffimmili Kristian Øysteinimit 45 sekundinik kigaanneruvoq, katillugillu nr. 111-inngorpoq.
Kristian Kristoffersen aamma Øystein Slettemark maanna Østrigimi Obertilliachiliarput, tassani naggataamik unammigallassallutik januaarip 3-anni sungiusaqatigiilinnginnerminni.