Persuarsiorluni takutitsinermi Kalaallit Nunaat malunnaateqarluarpoq
Whitehorsemi AWG-p ingerlanneqarnerani persuarsiutigalugu takutitsinermi, Napa-p isiginnaagassiarititaa ”Eqqissinerup angerlarsimaffia” takutitat sakkortunersaannut ilaalluinnarpoq
Arctic Winter Games timersornerinnaanngilaq.
Kulturikkut aamma takutitsisoqartarpoq. Ukiorpassuanngortuni AWG-mi persuarsiutigalugu takutitsisoqarnerani Napa isiginnaagassaqartitsisuusarpoq. Ukiut tamaasa Kalaallit Nunaanneersut nuannarineqartunik isiginnaartitsisarnerat maluginiarneqartuartarpoq. Ukioq manna aamma taamaappoq.
Atuaruk "Inuusuttut qitittartut AWG-mut piareerput"
”Eqqissinerup angerlarsimaffia" piviusut takorluukkallu akornanni pisut pillugit isiginnaagassiaavoq timersornartoq, isiginnaartitsinermik, nipilersukkanik, qitinnermik, ussersornermik oqalugassiamik saqqummiilluni isiginnaartitsineruvoq. Isiginnaagassiaq isiginnaartut nuannareqaat, taamaalillutillu Kalaallit Nunaanneersut ukioq manna aamma inuusuttut nuannarisaannik kingumut isiginnaagassiipput.
Timersornermut kulturimullu Naalakkersuisup Mimi Karlsenip isiginnaagassiaq aamma isiginnaarpaa, suliarilluagaanerarlugulu. Isiginnaagassiaq naammassimmat isiginnaartitsivimmut qaqilluni isiginnaartitsisut ilassivai. Nuannaarutissaqaramillu tamarmik nuannaarput.