Piffissanngorpoq: Kalaallit Nunaat Sydkoreamut unammilerpoq
Kalaallit arnat assammik arsarlutik nunanut allanut unammisartut tallimanngornermi nal. 18.00, tassa nunatta nalunaaqutaa malillugu nal. 15.00 unammeqqittussanngorput. Timersuutini angusinnaasanik naatsorsuisarfik, spilxperten.com naapertorlugu Kalaallit Nunaat tupaallatsitsisinnaavoq, tamannali ajornaatsuinnaanavianngilaq.
Kalaallit Nunaat Sydkoreamut ullumi unammissaaq. Sydkorea oqaluttuarisaanermi OL-imi ingerlalluarnerusarpoq, VM-imilu angusatigut appasinnerusarluni.
Unammineq nalunaaqutaq 18.00 aallartissaaq, tassa nunatsinni nalunaaqutaq 15.00-nngorpat.
Sydkorea Østrigimut pingasunngornermi 29. november unammigami ingerlalluaqaaq. Unammineq aallartissimatsiaannartoq kinguaraluarpoq, unamminerulli ingerlanerani Østrigip isertitai malilerpai, unamminerlu naligiilluinnartumik ingerlavoq.
Sydkorealli Østrigip arsanik isaatitsinera unitsissinnaasimanngilaa, unamminerlu naammassimmat Sydkorea 29-30-mik ajorsarpoq.
Kalaallit Nunaat tupaallatsitsisinnaasoq
Spilxperten.com naapertorlugu Sydkorea vm-imi ingerlalluarnerunissamut Østrigimit periarfissagissaarnerugaluarpoq. Aammali erseqqissarneqarpoq nuna OL-imi ingerlalluarnerukkajuttoq.
Kalaallit Nunaata ingerlalluarnissaanut naatsorsuutit 21,00-miipput, Østrigimut naatsorsuutit 26,00-miillutik.
- Kalaallit Nunaat eqimattami sanngiinnertut inissisimasutut isikkoqarsinnaavoq, angusalli soorunami unammissutaassapput, oqaatigiuminaapporlu kalaallit arnat naatsorsuutigisamit angusarissaarneroratarsinnaanersut spilxperten nittartakkamini allappoq.
Sydkoreamut unammineq Nuummi Inussivimmi isiginnaarussuakkut takutinneqarnissaa naatsorsuutigineqarpoq, kalaallit unamminerat siulleq Katuami malinnaaffigineqarsinnaammat, Katuaq ulikkaarluinnarsimammat.
Kalaallit Nunaat Norgemut pingasunngormat unammigami ilisimaneqartutut 11-43-mik ajorsarpoq.