Pitsaanerit aallartilluarput

Aasianni sisoraatinik oqilaniunneq aallartillualaavippoq. Ullut unammiffiusut siulliit marluk naammassereerput ullumilu ataasinngornermi pissartanngorniuttut siullermeerlutik freerfeqarput. Arfininngornermi qangatoornermi angutit 20 kilometeri arnallu 15 kilometeri unammiffigaat.

Soorlu siumut ajugaasussatut naatsorsuutigineqarsimasut ukioq manna Arctic Circle Racemik ajugaasut, Martin Møller aamma Niviaq Chemnitz Berthelsen, ajugaasuupput.

Angutini sisorartartut 14'it peqataapptu, ingerlaarfimmi Martin Møllerip atorpai minutsit 57,46. Tulliatut apuuppoq Karl-Peter Kristensen atorlugit minutsit 58,52. Pingajuattut apuuppoq Kristian Kristoffersen atorlugit minutsit 58,54.

Arnani sisorartartut 13'it peqataapput ataaseq aqqutaani taamaatiinnarpoq. Arnani Niviaq Chemnitz Berthelsenip 15 kilometerit ingerlaarpai atorlugit minutsit 50,30. Tulliulluni apuuppoq Miillaaraq Lennert atorlugit minutsit 57,35. Pingajuattut apuuppoq Alida C. Rafaelsen atorlugit minutsit 59,47.

- Arnani Niviaq Chemnitz Berthelsen suli pitsaanerpaajuvoq, angutini Martin Møller inuusuttuaqqanit malersorluarneqartoq. Tassani pineqarput Karl-Peter Kristensen aamma Kristian Kristoffersen, Ole Lynge Hansen oqarpoq, Kalaallit Nunaanni Sisorartartut Kattuffiani sisoraatinik oqilaniuttartut immikkoortortaani siulittaasoq.

- Arfininngornermi meeqqat sukuuternermi teknikki atorlugu unammisinneqarput sapaammi sprinterlutik. Meeqqat ineriartornerat kajumissusaallu akornuteqanngillat. Arctic Winter Gamesini peqataanikut sapaatip akunnerata naanerani unammersuarneq aalajangiisuuffigaat, peqataasulli allat aamma meeqqat arfininngornermi sapaammilu unammersuarnernut sunniuteqarluarput.

- Meeqqat ingerlariaqqinnissaannut pitsaasorujussuuvoq - meeqqat aallulluarneqarnerat sineriammi timersoqatigiiffiit sulilluarnerisa kinguneraat. Inuusuttuaqqat akornanni timersuut suli soqutigineqarluarpoq ineriartornerlu pitsaalluni, Ole Lynge Hansen oqarpoq.

Iligiikkaarnermi ASP meeqqani inersimasunilu pointitigut siuaqqagallarput.