Polar Seafood Super Cup U11: Meeqqat anngunniullutik unammisaqattaarput
Tallimanngornermi Polar Seafood Super Cup U11 aallartinneqarpoq. Meerarpassuit sineriassuarmiit aggerfillit pissangallutik qilanaarlutillu unamminissaminnut piareersimasut ilisaritinneqarmata assiliisorput Leiff Josefsen najuuppoq. Unammisussat puljenut marlunnut avinneqarsimasut maanna anngunniullutik unammisaqattaaleruttorput.
Tikkuut aappaluttoq assip ataaniittoq toorlugu assit amerlanerusut takusinnaavatit.
Meerarpassuit Uummannammiit, Aasianniit, Ilulissaniit, Sisimiuniit, Nuummiit, Narsamiit, Qaqortumiit aammalu Nanortalimmiit piffissami matumani Nuummiipput inissilluarnissaminnullu unammersuarlutik U11-p ingerlanneqarnerani.
Polar Seafood Super Cup U11-mi, Nuummi Inussivimmi unammeqataasussat tallimanngornermi tamarmi ilisaritinneqarput. Tamatuma kingorna dommerip siggartaataa aallartimmat unammisaqattaarnerit aallartinneqarput.
Taamaalilluni tallimanngornermi ualikkut anngunniulluni unamminerit 14-it ingerlanneqarput. Anngunniulluni unammisaqattaarnermi unamminerit 2x7 minutsinik sivisussuseqartinneqarput.
Taamatuttaaq arfininngornermi unammisaqattaarnerit nanginneqarput. Unammisaqattaarnerit aallartinneqarput nalunaaqutaq 09:00 ingerlanneqassallutillu unnugu 19:00 missaata tungaanut.
Meeqqat Super Cup-ernerannik igisinnaariarusuttut isilernermi akiliilaarlutik Inussivimmut isiginnaariarnissaminnut periarfissaqarput (0-4 år akeqanngilaq, 5-11 år 15 kr. og 12 år+ 30 kr.).
Inissinniunnerit sapaammi ingerlanneqassapput
Sapaammi anngunniunnerit naggatai ingerlanneqareerpata inissinniunnerit nalunaaqutaq 13:00 aallartinneqassapput, tassani unammisaqattaarnerit 15-nngorniunnermiit, kvartfinalit, semifinalit soorunalumi ajugaaniutivinneq ingerlanneqassapput.
Kvartfinalinut, semifinalinut ammalu finalimut piffissaliunneqartut 2x10 minutsiupput.
Polar Seafood Super Cup U11 sapaammi unnikkut diplominik medaljenillu agguaassinermik naggaserneqassaaq. Naggataarnersiornerlu aallartinneqassaaq sapaammi nalunaaqutaq 19:30.