Portomi arsallammaap Savalimmiut nakkartippai

VM-imut anngunniunnerup aallartinnerani Savalimmiut tupaallatsitseqalutik siullermik Ungarnimut 0-0-mik angusaqarpoq kingornalu Letland 2-0-imik ajugaaffigallugu, ataasinngormalli europami pissartanut Portugalimut tupaallatitserujussuaqqinnissaminnik sinnattuat sukkasuumik qaminneqarpoq.

Pingasoraartoq
FC Portomi arsallammaap 20-nik ukiullip André Silvap savalimmiormiut tamaviaaraluaqisut siusissukkut sinnattuat qamippaa, minutsit 12-issaannit 37-issaannut tulleriisiinnarlugit pingasunik isertitsigami, taamaasillunilu 6-0-imik ajugaanissaq tunngavilerneqarpoq.

Europami pissartat portugalimiut unamminerup immikkoortua siulleq tamaat aqulluinnarpaat, arsaattuni tusaamasaanerpaaq Christiano Ronaldo takussaarpianngikkaluartoq.

Muminnermi 3-0
Savalimmiormiut unamminerup aallaqqaataaniit naanissaanut sapersartinneqarput, tamannalu muminnermi kisitsisit takutissinnaavaat.

Unammiartortut muminnermi 3-0-mik siuarsimaannanngillat, isertitseriarnerit 14-0-mik inerneqarpoq.

Qasuersaarnermi portugalimiut sungiusaasuata Fernando Santosip unammisartuni eqqissisimalaarneraqqusimagunarpai. Tassami unamminerup immikkoortuata aappaani sukkaannerusumik ingerlapput, savalimmiormiullu malinnaalluarnerusinnaalerput.

Immikkoortulli aappaata qiteqqunnerata nalaani malunnaateqarpiarsimanngikkaluartup Christiano Ronaldop unammineq sukkatsippaa, isertitseriartarfiullu avatinnguani unammeqamminik tunioraateriarluni saamimminik 4-0-imut isertitsivoq.

Isertitsinngitsoorput
Savalimmiormiut mianersuuppaat isertitsiniassanerlutik, Thorshavnimi arsaattarfimmi isiginnaartunik tipaatsutsitsisinnaasumik, imaluunniit ajorsarujussuarnaveersaassanerlutik. Isertitsinngitsoorpulli. Akerlianik Joao Moutinho aammalu Joao Cancelo piffissaliussami tulleriisiinnarlugit isertitsipput, taamaasillunilu portugalimiut 6-0-imik ajugaapput.

Gruppimi maanna Portugal arfinilinnik pointeqarpoq, Savalimmiullu sisamanik pointeqarput.

Schweiz siuttuuvoq ataasinngormat Andorra 2-1-imik ajugaaffigalugu pointit pissarsiarineqarsinnaasut tamakkeramigit, Ungarnilu Letlandimi 2-0-imik ajugaavoq.

/ritzau/