Qaanaami timersornermik aqutsisut pikkorissartut
Qaanaami timersortarfimmi maajip 10-ani 11-anilu sammisaqartitsiviulluarpoq. Pikkorissartut qulingiluat ilitsersuisartunit Kista Isaksenimit Niels Benjaminsenimillu pikkorissarneqarput.
Pikkorissartut ilaatigut pikkorissarfigaat timersornikkut perorsaaneq, sungiusarnermut pilersaarusiorneq, timersornermi avatangiisit, sillimaniarneq akisussaaffillu, sungiusaarnermi tunngaviit, il.il..
Pikkorissaaneq pikkorissaanerit taamaattut sisamassaraat. Pikkorissarneq Dansk Idrætsforbund aamma Kalaallit Nunaanni timersoqatigiiffiit Kattuffiata suleqatigiinnerisigut ingerlanneqarneqarpoq.
- Isumaqarpunga pissarsiaqarluarlunga, aamma meeqqanik sungiusaalluarsinnaallunga isumaqarpunga, pikkorissartut ilaat Malik Kleist, 22-nik ukiuliki, sermitsiaq.gl-imut oqarpoq.
Malik Kleistip QNQ-mi assammik arsartartut 15-18-inik ukiullit sungiusartarpai.
- Qaanaami isikkamik arsartarpugut, assammik arsartarpugut, volleyball, aamma ataasiakkaat badmintonertarput. GM-ertunut aamma peqataanikuuvugut, soorlu ukioq kingulleq angutit U21-it Sisimiuni assammik arsarneranni peqataapput. Kisianni ajoraluartumik akisusangaarmat periarfissaqanngingajavippugut. Ukioq kingulleq arsartartut 10-it Sisimiunukartinneranni aningaasartuutit 150.000 koruuniupput. Thulefondimit ikiorneqarpugut, taamaanngippat aallarsimanavianngikkaluarpugut, erseqqissaavoq.
Ukiukkut qaammariartoqqikkaangat isikkamik arsartartut sikumi arsartarfiliami arsaattarput. Aput aakkaangat arsartarfimmut qulimiguulinnut mittarfikumut nuuttarput. Isikkamik arsartartut arsartaleqqinnissaminnut qilanaarput, arsaattarfiup qaava pitsanngorsarniarlugu kommuni neriorsuimmat.