Qaannamik unammersuarnerit naammassilluartut
Qaannamik unammersuarnerit sapaatip akunnerani kingullermi ingerlanneqareerlutik naammassilluartutut, Qaannat Kattuffianni siulittaasumit nalilerneqarput. Kajumissutsiminnilli suliaqartut amerlanerunissaat kissaatigineqarpoq.
Naakkiarnerit, parrunnerit takisuumullu unamminerit Ilulissani sapaatip akunnerani ataatsimi ingerlanneqareersut, qaannamik unammersuartitsinerit naammassilluarput.
Ilulissani unammersuartitsineq Qaannat Kattuffianni siulittaasumit Johanne B. Tobiassen pitsaasumik ingerlanneqarsimasutut nalilerneqarput.
- Timersornertaa iluatsilluartorujussuuvoq. Peqataasut arlalissuit takutitsilluarput, inuusuttunnguillu aamma qaannamik soqutigisaqarluarnerat maluginiagassaalluni, Johanne B. Tobiassen Sermitsiaq.AG-mut oqaluttuarpoq.
Taassuma maluginiarpaa kajumissutsimik suleqataasut amigaatigineqartut.
- Kajumissutsiminnik suliaqartut amerlanerunissaat pisariaqartilluinnarparput, pingaartumik unammersuarnermik taama angitigisumik suliaqarnermi. Aappaagussamut kajumissutsiminnik suliaqartut amerlanerunissaat kissaatiginarpoq, oqarpoq.
Maligassiuisut arlallit
Johanne B. Tobiassenip oqaluttuaraa kulturimik eriaginnittut arlallit unammersuarnermi peqataasut maluginiarsimallugu. Inuit innarluuteqartut marluk, innarluutiminnik aporfeqaratik unammersuarnerni unammeqataasimasut immikkut eqqaajumavai.
- Taakku marluk innarluutiminnik aporfilersoratik unammisut allat peqatigalugit unammipput. Piumassuseqarluinnarnerat tassuuna takusinnaavarput. Unammeqataasup aappaa unamminermi avataatigut ullut tamaasa kajumissutsiminik suleqataavoq, nersualaangassarujuullunilu, Johanne B. Tobiassen oqaluttuarpoq.
Qaannamik pissartanngorniunnermi qaannat qanoq inneri tamatigut nalilersorneqartarput. Naliliisartut qajaq qajannartutut nalilerpagu aappaagussamut aserfallatsaaliorneqarsimanissaa taarserneqarnissaaluunniit innersuussutigineqartarpoq. Johanne B. Tobiassenilli paasisai malillugit qaannamik piginnittut inassuteqarfigineqarsimagaluarlutilluunniit qaannatik nikisinnagit aappaaguani atoqqiinnartarpaat.
- Naliliisut qajaq qajannartutut nalilerpassuk, piginnittup ussissartariaqassavaa, imaluunniit nutaamik amerlugu, tamaalluunniit taarserlugu. Qajaq qajannartoq ulorianarluinnarsinnaavoq, Johanne B. Tobiassen nassuiaavoq nangillunilu:
Qajaq paaralugu
- Qajartortoq navialiguni, nammineq kisimi ulorianartorsiornavianngilaq, annaassiniartulli aamma ulorianartorsiortussaapput annaassiniaanerminni. Qajaq qajannartoq atussallugu namminissarsiorneruallaarpoq, oqarpoq.
Qajartortartoq Nuummiu, Kristian Evaldsen, nersualaarpaa. Taassuma qajaa qajannartutut nalilerneqarmat, pissartanngorniunnerit naammassiniariartut qaannami amia tamaat alittorpaa, saarngi nuisillugit. Taamaasiorpoq qaannap qajannassusianik naliliisut inassuteqarnerat ataqqiniarlugu.
- Taanna inassuteqarfigineqarsimavoq aappaagussamut nutaamik amiisariaqartoq. Unammiuaarnerit naammassiniariartut peqataasut isigitillugit qaanni ameerpaa. Taamaasiorpoq naliliisut inassuteqarnerat ataqqiniarlugu, nutaamik qaanniortussanngorluni, Johanne B. Tobiassen oqarpoq.
Qajaatillit qaannaminnik aserfallatsaaliisarnissaannik taanna innersuussivoq, imarsiorneq isumannaannerpaamiiteqqullugu.
Qajaq Nuuk inersimasut pissartanngorniunnerni angusarinnerpaallutik pokalimik ingerlaartumik angerlaassipput. Qajaq Qaqortoq meeqqani angusarinnerpaagami pokalimik ingerlaartumik aamma angerlaassipput.