Qallunaat kalaallinut ajugaarujussuarput
Kalaallit arnat volleyball-rtartut oqaluttuarisaanermi siullerpaamik volleyball-imi Danmark-imut unamminerminni 0-3-mik ajorsarput sæt-ini kisitsisitaralugit 25-17, 25-11 aamma 25-3.
Kalaallilli sapaammi unammeqqinnermi makeqqipput sæt-it aappaanni siuaqqaleraluarlutik.
– Kalaallit arnartaat sæt-ini siullerni marlunni akiuulluaraluarput sæt-illi pingajuanni akiuuppiarunnaarlutik, taama oqarpoq qallunaat sungiusaasuat Tony Westman arfininngornermi unammineq naammassisoq.
Arfininngornermi kissassernermi kalaallit arnartaat pissanganerup pianik qeratasut malunnarsereerpoq, sæt-ili siulleq qiteqquttoq qitulipput arsarlualeraluarlutillu. Aamma kalaallit sungiusaasuata arsartumi pissanganerat paasisinnaalluarpaa.
– Una unammineq arnanut misigisaavoq imaannaanngitsoq aammalu sungiusaataalluarpoq pikkorissunut Danmark-imut unamminerput. Sæt-it tamarmik uagutsinnut naleqarput arsartullu siuariartornerat malunnarpoq. Ilutsinni akiorniagaqarpugut tupilaatitsinnik taannalu tassaavoq kukkunissamut qununeq. Arsartut kukkunissamut qunujunnaarnissaasa anguniarnera sivisusinnaavoq. Taanna qaangersinnaagutsigu suli siuariarnerussaagut, taama Jens Graabæk oqarpoq.
Sæt-ip siulliup naajartornerani kalaallit ingerlallualeraluarput point-it 17-it angullugit. Sæt-illi aappaanni point-it aqqanillit naammagiinnartariaqarpaat. Sæt-it pingajuanni qallunaat isertippaat Eva Mielskov Bang pissiutaa sakkortuumik aallartitseqattaarluni takutitsilluaqisoq taasumalu kalaallit ajornartorsiortilaalippai sæt-it pingajuanni pingasuinnarnik point-innammata.
Sapaammi imminnut unammeqqipput tassanilu kalaallit 0-3-mik ajorsaqqipput sæt-inili 25-10, 25-23 aamma 25-20-mik angusaqarnerisa takutippaat siuariartorluartut naak unamminermi tassani qallunaat pikkorinnerit arlallit aamma isersimagaluartut.
– Pissiutaa sakkortuumik aallartitsinernut piareersimaneruvugut taamalu Eva Mielskov Bang-ip sakkortuumik aallartitsisarnera tigulluarsinnaanerullugu. Sinaatigut saassussisartut sungiusaqatigiinnermi takutitserpiarsimanngitsut sapaammi arsarluarnerulerput unammisatsinnut ilungersuatitsinerullutik, taama Jens Graabæk oqarpoq sapaatip akunnera sungiusaqatigeereerlutik arsartuni tuiisigut pattalaarlugit ataasinngornermi inuulluaqqoreerlugit.