Qatanngutigiit VM-imut piareerput
Inuk aamma Sondre Slettemark inuusuttut Estlandimi ooqattaasarnermi VM-erneranni peqataassapput.
Qatanngutigiit Inuk aamma Sondre Slettemark sapaatip-akunnerata naanerani inuusuttut nunarsuarmi pissartanngorniunnissaannut piareerput.
Arfininngorpat Otepaami Estlandimiittumi ooqattaasarluni VM-erluni inuusuttut inuusuttuaqqallu unamminerat aallartissaaq.
Inuk 17-inik ukiulik nukappiaqqani 19-it inorlugit ukiulinni arpassaaq, Sondrelu 19-inik ukiulik angutini 23-t inorlugit ukiulinni arpassalluni.
Kalaallit Nunaanni Biathlonertartut Kattuffiat taamatut paasissutissiivoq.
Silatusaartumik aallarniineq
Sondre Slettemark ukiumi unammiffiusumi angusarissaarpoq juullertinnagu inersimasuni IBU Cupimi qulingiluaattut inissikkami, IBU Jr. Cupimi sisamaattut Polenimilu qaammatit nikinneranni januaarimi februaarimilu inuusuttuni Europami pissartanngorniunnermi sisamaattut inissilluni.
Inuk Slettemark unamminerni ikittuni peqataasimavoq ajoraluartumillu ukioq manna napparsimakulasimalluni. Taamaattumik piukkunnarnera nalorninartoqarsinnaavoq, kattuffimmit oqaatigineqarpoq. Taamaattorli Inuk Norges Cupimi januaarimi angusarissaarpoq normu 10-nngorluni.
Ilaqutariit Slettemarkikkut inuusuttut nunarsuarmi pissartanngorniunneranni peqataasarsimapput, qatanngutaat Ukaleq Slettemark 2019-imi tupaallaatigineqaqaluni 10 kilometerimut ataasiakkaarluni sukkaniunnermi nunarsuarmi pissartanngorpoq.
Unammiuaarnermi pilersaarutit imaapput:
- Arfininngorneq 24. februaari nal. 06.30 (nunatta nalunaaqutaa malillugu): Inuk 12,5 km arpassaaq sisamariarlunilu igilluni
- Sapaat 25/2 nal. 06.30 (nunatta nalunaaqutaa malillugu): Sondre 15 km-imut arpassaaq sisamariarlunilu igilluni
- Marlunngorneq 27/2 nal. 06.30 (nunatta nalunaaqutaa malillugu): Inuk 7,5 km arpassaaq marloriarlunilu igilluni
- Pingasunngorneq 28/2 nal. 06.30 (nunatta nalunaaqutaa malillugu): Sondre 10 km-imut arpassaaq marloriarlunilu igilluni
- Sisamanngorneq 29/2 nal. 06.00 (nunatta nalunaaqutaa malillugu): Inuk 12 km-imut arpassaaq sisamariarlunilu igilluni (anngussimassaguni)
- Sisamanngorneq 29/2 nal. 09.20 (nunatta nalunaaqutaa malillugu): Sondre 12 km-imut arpassaaq sisamariarlunilu igilluni (anngussimassaguni)