Qeqertarsuarmi sisorarfiit majuartaatasa napparutai kuugussaasut
Qeqertarsuarmi sisorarfiit majuartaataasa napparutai qulingiluaasuni pingasut aputip aannerani kuussuarujussuarnerani sequmilluinnarsimapput. Kommunip nalilerpaa sumiiffimmi majuartaasersuinissaq navianarsinnaasoq.
Kommune Qeqertalimmi kommunalbestyrelsemi ilaasortat sisamanngornermi 31. august ataatsimiilerpata Qeqertarsuarmi sisorartarfiit majuartaataat pillugit nutaarsiassamik tusagassaqartinneqarput.
Nutaarsiassarli nutaarsiassatsialaanngilaq.
Kommune Qeqertalimmi Inoqarfiit pillugit ataatsimiititaliap kommunalbestyrelse ilisimatissavaa Qeqertarsuarmi sisorartarfiit majuartaataasa napparussui qulingiluaasuni pingasut qarsutsinermit sequmivissimasut. Sequmissimasullu iluarsartuunneqarsinnaanngitsut. Illoqarfimmi aperujussuartarnerata kingorna aasalernerani aput aapiloorpoq, qarsutsineqarsimallunilu.
Kommune Qeqertalimmi 31. august ataatsimiinnissami oqaluuserisassani tamanna nassuiarneqarpoq.
- Pisup matuma takutippaa piffimmi tassani majuartaatitaarnissaq isumannaallisaaneq eqqarsaatigalugu aarlerinartoq ulorianaateqarluinnartorlu, allassimavoq.
Milliuunilikkaanik akeqartoq
Qeqertarsuarmi sisorartarfinni majuartaatinik sanaartornissamut suliniut ukiuni arlalinni ingerlanneqareerpoq, milliuunilikkaanillu kommunimut akeqarsimalerluni.
2020-p aallartinnerani kommunalbestyrelse ilisimatinneqarsimavoq suliniut 600.000 koruuninik naleqartussatut siullermik tagginneqarsimasoq, 11 milliuunit koruuninik aningaasartorfiusimalersoq.
Suliniummullu kommunalbestyrelse aningaasaleeqqissimavoq:
- 2022-mi 1.647.895 kr. aningaasaliissutinit nuunneqarnikuupput, taakkunannga kisitsisit kingulliugallartut aallaavigalugit maannamut 477.350 kr. atorneqareersimalerlutik, taamaalilluni 1.170.545 kr-it sinnerullutik.
Sumiiffik ulorianartoq
Misissuinerit nutaat nalilerpaat Qeqertarsuarmi majuartaatiliorfiusoq navianarluinnarsinnaasoq:
- Piffimmi pineqartumi assingusumik pisoqaqqinnissaa aarlerinaateqarmat isumannaallisaanikkut sillimaniarneq eqqarsaatigalugu innersuunnanngilaq majuartaatip maanna inissisimaffigisaani sanaartortitsisoqarnissaa.
Qeqertarsuarmi sisorartarfiit majuartaatiliorfiunerat pillugu suliniut kommunalbestyrelsep kingusinnerusukkut aalajangiiffigissavaa.