Qimmerinnerpaaq toqqarneqarpoq
Ilannguaq Berthelsen Ilulissaneersoq 1000 kroninnappoq Avannata Qimussersuani qimerinnerpaagami.
Avannaata Qimussersua naammassillugu arfininngornermi unnukkut unnussiuaarnermi qimmerinnerpaaq toqqarneqarpoq, tamatumuuna Ilulissaneersoq Ilannguaq Berthelsen toqqarneqarluni. Diplominnappoq, qamuteerannalluni, 1.000 koruuninillu akissarsilluni, knr.gl allappoq.
Qimmillip qimmiisa uinnarinnerat, isikkorinnerat, peqqippasinnerat nerisinneqarluartarnerallu misissorneqartarput. Ukiormanna qimmerinnerpaamik pingajussaa toqqaasoqarpoq, Qeqertarsuarmiuinnaat ukiuni kingullerni qimmerinnerpaasarsimapput.
Avannaata Qimussersua ippassaq naammassimmat 40 kilometerimut isorartutigisumut sukkaniunnermi ajugaasuuvoq, siornatigut 1996-imi 2004-milu Avannaata Qimussersuanngortareersoq Ville Siegstad, Ilulissaneersoq.
Ville Siegstad 20.000 koruuninnappoq nerukkaatissanillu poorsuarnik 30-inik pinnalluni.
Avannaata Qimussersua qimussersartunit 39-nit kujammut Sisimiunit avannamut Upernavimmit peqataaffigineqarpoq.
Avanersuaq Tunulu qimuttoqarfiugaluartut taakkunanngaanniit peqataasoqarsinnaasanngilaq, aqqutaa akisuallaarmat, taama Kalaallit Nunaanni Qimussertartut Kattuffiianni siulittaasoq Mikkel Jeremiassen oqarpoq.
Nersutit nakorsaat Elisabeth Mærsk-Møller Ilulissanit oqarpoq nammineq unammersuarnermi ippassaq isiginnaariarsimalluni.
- Sulinnginnama qimmit allameersut misissunngilakka. Kisianni isikkoreqaat. Ilulissani qimuttut takujuartarakkit paarilluarneqartut nalunngilara, nersutit nakorsaat oqarpoq.