Qimusseq Sisimiut: Avannaata Qimussersuanut piareerpugut

Sisimiuni qimussertartut peqatigiiffianni siulersuisut, Uummannap sikuata qanoq innera pillugu assit arlalissuit qaammatip kingulliup ingerlanerani takusarsimavaat. Uummannamimi Avannaata Qimussersua ingerlanneqarsinnaajunnaarpat, Qimusseq Sisimiut aaqqissuussisussatut tullertut sillimasussaatitaasimavoq.

Tamannalu piviusunngorpoq Uummannap sulluata sikkorlunnera pissutigalugu.

- Pissangasimaqaagut, Uummannallu sulluani sikup qanoq innera pillugu assit nittartakkani attaveqatigiiffiusuni saqqummiunneqartut tamaasa qimerloortarsimallugit. Soorunami pissanganarluinnarsimavoq, aaqqissuussileriasaarnissatsinnulli piareersimasimavugut, Qimusseq Sisimiuni siulittaasoq Susanne Berthelsen Sermitsiaq.AG-mut oqaluttuarpoq.

Piareersaatit naammassilertut

Kalaallit Nunaanni Qimussertartut Kattuffiat, KNQK sisamanngormat aalajangernerminik nalunaaruteqarpoq, tassa Avannaata Qimussersua Sisimiunut ukioq manna nuunneqassasoq, unammiffissaq 1. april allanngortinnagu.

Unammersuarnissamut ullut 18-iinnanngortut, siulittaasoq qularani oqarsinnaalerpoq:

- Piareeqqavugut! Piareersaatit arlallit ullut tulleriisiinnarlugit ingerlatereerpagut, kajumissutsiminnillu suliaqartussat aamma ataatsimeeqatigereerlugit. Tikittussat tikilluaqqunissaat qilanaaraarput, Susanne Berthelsen oqarpoq.

- Soorunami Avannaata Qimussersuata Uummannami ingerlanneqarnissaa ataqqilluinnaraluarparput. KNQK-lli aalajangernerata kingorna akisussaaffimmik tigusinissamut piareeqqasimavugut, neriuppugullu unammineq nuannersumik ingerlassasoq, peqatigiiffimmi siulittaasup tullia Najannguaq Enoksen oqarpoq.

Kajumissutsimik ikiuuttorpassuit

Piareersaatit ilaat aningaasaqarnermut tunngapput. Peqatigiiffiup pingaartippaa peqatigiiffik aningaasaateqassasoq, aningaasartuutaariasaartussat sillimaffigiumallugit.

- Piareersarnerit aallartilluaratsigilli ikiuukkumasorpassuit nalunaarsimapput, tamanna tupannalaarpoq. Oqarsinnaavugut ikiuukkumasunik naammattunik peqarpugut. Kajumissutsiminnilli ikiuusuttut saaffiginninnissaannut tikilluaqqusaapput, kajumissutsimik suliaqartut amerlavallaanngisaannarput, Sisimiuni qimussertartut peqatigiiffiani siulittaasoq oqarpoq.

Qimusseq Sisimiut ilisimatitsivoq Avannaata Qimussersuata ingerlannissaanut illiniliorneq Arctic Circle Racemik aaqqissuisut peqatigalugit naammassineqareersimasoq.