Qimussillammak naggataarlunilu rekordiliivoq
Jørgen Kristensen Avannaata Qimussersua 2013-mi ajugaasuuvoq taannaavorlu Nunatsinni kisiartaalluni tallimariarluni sukkaniunnersuarmi tassani ajugaasimasoq. Angusat tamakkiisut takukkit
Jørgen Kristensenip qimussimik sukkaniuttartutut naggataarnera pitsaaneroriarsinnaanngilaq. Illoqarfimmini ajugaavoq sukkaniunnermi arlalitsigut oqaluttuarisaanermut ilannguttumi.
Sukkaniuttarnersuaq ingerlanneqartalermallii minutsilersorluni tulleriiaarluni aallartoqarpoq. Jørgen Kristensenillu sukkanersaalluni kilometerit 35-it ingerlasimavai 1.33,35 tiimit atorsimallugit, Kristian Lundblad Sisimiuneersoq 1.35,57 tiimit atorlusimallugit tulliusoq. Pingajuuvoq Kunu Markussen Ilulissaneesoq 1.39,36 tiimit atorsimallugit.
- Isumaqarpunga marlukkaarluni aallartarluni minutsilersuilluni sukkaniunneq sukkanarnerusoq, aaqqissuisut Qimussersaq sinnerlugit Ville Siegstad Sermitsiaq.AG-mut oqarpoq.
Akornusersuutinngillat
Aallaqqaarfissap nalaata aputaasappallaarnera pissutigalugu sukkaniunneq minutsilersuineq najoqqutaralugu ingerlanneqarpoq.
- Qimussersut taamaasillutik eqqissillutik aallarsarsinnaapput, Ville Siegstad ukiuni qulikkaani sisamanngulersuni sukkaniuttartuusoq oqarpoq.
- Tassami tattoqisaannartarpoq qimussit 25-30-it ataatsikkut aallaraangata ilaatigullu ilaruttoortoqartarluni. Uani nammineq ingerlanissartik annermik kisiat isumagalugu sukkaniupput, Ville Siegstad oqarpoq.
Jørgen Kristensen sukkaniuttartutut naggataarpoq. Nammineq aalajangersimavoq sukkaniutissaarniarluni pissatseruttorfimmilu naggataarpoq. Avannaata Qimussersuani ukiut sisamat tulleriit ajugaavoq katillugillu tallimariarluni ajugaanikuulluni.
Naligeeqaat
Sukkaniunnermi arnartatuaasoq Rita Inûsugtok peqataasunit 26-nit normu 10-ulluni apuuppoq. Tikinnermini inuppassuarnit nilliasunit tikilluaqulluarneqarpoq qamutaaluni marloriarlugit kivinneqarput.
Unammineq naligiiffioqaaq sukkaniuttullu arlariiaarlutik minutseqatigiittarput sekundit arlaqanngitsunnguit taamaallaat nikingassutaaginnartarlutik.
Aajuku angusat tamakkiisut:
1 Jørgen Kristensen Ilulissat 1:33:35:22
2 Kristian Lundblad Sisimiut 1:35:57:44
3 Kuno Markussen Ilulissat 1:39:36:37
4 John Eliassen Ilulissat 1:40:09:01
5 Isak Siegstad Kangaatsiaq 1:40:14:05
6 John Davidsen Ilulissat 1:40:20:93
7 Ado Sandgreen Qeqertarsuaq 1:40:23:66
8 Søren Davidsen Sisimiut 1:40:42:88
9 Ove Johansen Qasigiannguit 1:41:37:79
10 Rita Inûgsugtoq Kangaatsiaq 1:42:49:74
11 Niels Davidsen Ilulissat 1:43:07:27
12 Algot Nielsen Qeqertaq/Saqqaq 1:44:32:09
13 Nikolaj Nielsen Qeqertaq/Saqqaq 1:46:15:42
14 Samuel Villadsen Qasigiannguit 1:46:16:13
15 Malik Samuelsen Qasigiannguit 1:46:44:86
16 Gert Frederiksen Kangaatsiaq 1:52:07:13
17 Malik Johansen Qasigiannguit 1:53:07:77
18 Malik Jeremiassen Qasigiannguit 1:54:19:82
19 Piitannguaq Kristensen Sisimiut 1:54:29:72
20 Markus Thorleifsen Qeqertaq/Saqqaq 1:54:37:29
21 Marius Inûgsugtoq Sisimiut 1:54:57:43
22 Anders Petersen Qeqertarsuaq 1:55:20:68
23 Hans Jørgen Lukassen Qeqertarsuaq 2:02:17:20
24 Anda Jeremiassen Kangaatsiaq 2:08:32:21
25 Jonas Jessen Sisimiut 2:10:15:43
26 Jens Møller Qeqertarsuaq 2:14:16:66