Real Madrid Unitedimut ajungaanermini Super Cuppenimi ajugaaqqippoq
Casemiro aamma Isco Super Cuppenimi Real Madridip Manchester Unitedimut ajugaanerani isertitsisuupput.
Ukiup aappassaani Real Madrid europamiut isikkamik arsaallutik Super Cuppen-nianni ajugaapput.
Skopjemi unnukkut kiaqisoq Spaniamiut Champions Leaguemi pissartat Manchester Unitedi Europa Leaguemi ajugaasimasut 2-1-mik ajorsartippaat.
Ajugaaneq pissusissamissoorpoq, minnerunngitsumik unamminerup immikkoortuani siullermi Real Madrid arsaannerup annertunerpaartaa aqussimangamiuk. Unamminerulli immikkoortuata aappaani tuluit peqataanerulersimapput.
Real Madridip qaammatit marluk matuma siorna Champions League finalimi italiamiunut Juventusimut 4-1-mik ajugaanerminni unamminermi isersimaqqaartut ataasiinnarmik allannguuteqarfigisimavai.
Nunarsuarmi arsallaqqinnerpaaq, Cristiano Ronaldo, aasaanerani eqqissisimaareerluni uteqqammertoq kisimi taarserneqarsimavoq. Taanna Gareth Balemit taarserneqarpoq.
Real Madridimilu arsaatillaqqissoq alla unamminerup aallartiilaarnerani takutitsilluartuusimavoq
Unamminermi minutsit 15-t ingerlariitsiartut Casemirop arsaq niaqormillugu målit ikaarutaat eqqorpaa. Minutsillu qulit ingerlareertut taanna qeqqani arsaattartuusoq isertitsilluni Real Madrid 1-0-mik siuartippai.
Casemiro saassusseqataasimavoq Dani Carvajalillu tunissillualaavinneratigut arsaq Manchester Unitedip målmandia David De Gea isertitsivigaa.
Tuluit akisoorujussuarmik pisiarisimasatik Romelu Lukaku, Victor Lindelöf aamma Nemanja Matic unamminnermi ilaatippaat. Unitedillu arsaattartuisa Real Madridip arsaattartuisuulli suleqatigiilluarsinnaannginnerat, ersarilluinnartumik takuneqarsinnaavoq.
Unamminerup immikkoortuata aappaani minutsit arfineq marluk ingerlareertut Real Madridip Unitedip kinguarsimasui nikanarsalaariarlugit isertitseqqipput.
Iscop Gareth Baleli saassuteqatigaa, Unitedimilu kinguarsimasut isiginnaartuinnartut katariarlugit spaniamiu qularnaatsumik arsaq isertippaa.
Minutsit qulit qaangiuttut, Romelu Lukaku målit nikigassutaasoq 1-2-nngortimmagu, tuluit neriuuteqalerput
Real Madridip målmaniata Keylor Navasip isertitseriaraluarneq belgiamiup saassussisartoq toraanginnarlugu arsaq tillunnerata kingorna tamanna pivoq.
Unamminermi isertitsisoqaqqinngilaq, Real Madrillu taamaasilllu pokaleqarfini imaqarluareeqisoq ataatsimik ilaqqippaat.