Sisoraatinik ooqattaasarnermi Junior VM-imi aallartilluarpoq
Peqataarngaartoq Aqqaluartaa Olsen Sisimiuneersoq Canadami Junior VM-eqarnerani kalaallit angusaasa pitsaanersaat anguaa.
Aqqaluartaa Olsen Kalaallit Nunaanni inuusuttuni sisoraatinik arpattartuni isumalluarnarnerpaat ilagaat, taamak Kalaallit Nunaanni Biathlonertartut Kattuffianniit tusagassiorfinnut nalunaarummi allassimavoq. Tassani nangillugu oqaatigineqarpoq VM-imut peqataarngaartoq nunat tamat akornanni unammeqataarngaarnermini arpannermi siullerpaamik sisoraaserluni ooqattaasarnermi pimoorullugu ilaanermini takutitsilluarsimasoq.
VM-imi unammissut siulleq tassaavoq inummiit inummut unamminerit, unammiffik 12,5 kilometerinik takissuseqarpoq, sisamariarluni ooqattaasartarfeqarluni. Unamminermi ajugaasuuvoq franskeq Ludwig Ehrhart, taanna igeriarnernit 20-iusunit taamaallaat marloriaannarluni uniorpoq. Aqqaluartaa ajugaasumut sanilliulluni minutsit marluk sukkaanneruvoq, minutsillu pingasut sukkanerpaamut. Taamaalilluni Aqqaluartaa kusanavissumik normu 42-nngorpoq, taamak Biathlonertartut Kattuffianit oqaatigineqarpoq.
– Arpaffimmi qatsissusia nalugisinnaavara (1400-1500 meterit tungaannut), neriuutigisattut inerlanngilanga. Kisianni peqataarngaarnermi normu 42-lluni apunneq ajunngeqaaq, Aqqaluartaa Olsen tusagassiorfinnut nalunaarut naapertorlugu oqarpoq.
Oqilaniunnermi anori akornutaasimasoq uniornerit 2+2. Sukkassuseq aappassaanik pingajussaanillu kaajallannermi kigaallappoq taamalu normu 45-lluni apuulluni, katinneranilu normu 49-nngorluni. Angusaq kusanartoq, taamalu Aqqalu aqaguani Jagtstartimut anngulluni.
Jagtstart ilungersunartuuvoq, pingaartumik ooqattaasarnermi unammillernit sanileralugit nikorfalluni eqqartariaqartarami. Sisoraaserluni unammisartut misilittagaqarluartut amerlaqisut taamatut stress-ertinneqarnermi kukkuluttoajuttarput. Aqqaluartaa Olsen arpalluarluni kaajallannermi siullermi normu 23-iuvoq, siulliusumit 12 sekundinik kingulliulluni. Kisianni kaajallannerit tamaasa sukkassuseq kigaanneruleriartorpoq, taamalu normu 45-nngorluni apuuppoq, sukkanerpaamit 2,08 minutsinik sukkaannerulluni.
Kalaallit Nunaata sisoraatinik ooqattaasarnermi Junior VM-imi peqataatitaat marluk allat, Miillaaraq Lennert aamma Kristian Kristoffersen napparsimalersimallutik angusaat pakatsinarput. Kristian Kristoffersen sivisuumik napparsimareerluni VM-eriarsimavoq, taamaattorli unamminissaq sioqqullugu piareernissani neriuutigisimallugu. Kisianni ajoraluartumik iluarsisimanngilaq, taamalu Kristiaammut VM-mi naatsorsuutigisamit ajornerungaatsiarpoq. Miillaaraq ataasiakkaarluni unamminermini naarlulerluni uniinnartariaqarsimavoq. Napparsimmavimmi misissorneqareerluni nerisani naarluutigilersimallugit paasivaa, Kalaallit Nunaanni Biathlonertartut Kattuffiannit ilisimatitsissutigineqarpoq.