GM-it aallakaatinneqartarnerat
Siumukkormiu: Sooruna meeqqat unammersuarnerat KNR-ip aallakaatinngikkaa
Siumut sinnerlugu Inatsisartuni ilaasortaq isumaqarpoq oqimaaqatigiinngittoqartoq nunani tamalaani unammersuartut aallakaatillugit meeqqat unammersuarnerat KNR-mi radiomi tv-milu aallakaatinneqanngitsoq
Arsaannermi VM-ip nalaani unamminerpassuit aallakaatinneqarput kingornalu nunarsuarmi sikkilernerit sakkortunersaat Tour de France isiginnaarneqarsinnaalerluni. Siumut sinnerlugu Inatsisartuni ilaasortaq Jens Immanuelsen Naalakkersuisunut apeqquteqarpoq sooq nunat allamiut unammersuarnerat taamarsuaq aallakaatissinnarlugu meeqqat unammersuarnerat aallakaatinneqannginnersoq.
Ukioqqortussutsinni assigiinngitsuni arsaannermi Nunatsinni pissartanngorniunnerit ingerlaleruttorput meeqqallu angajulliit avannaani unammersuarnerat sisamanngornermi aallartippoq. Timersuutini allani aamma ukiup ingerlanerani unammersuartoqartarpoq. Meeqqalli unammersuarneri KNR radiomi TV-milu toqqaannartumik aallakaatinneqarneq ajorput.
Allannguisoqarli
- Tamakku pisortatigoortumik aallakaatinneqartanngillat uffa nunani allani arsaattut killeqangitsumik aallakaatinneqartut akissaqarfigineqarsimagamik, Jens Immanuelsen Naalakkersuisunut paragraf 37 naapertorlugu apeqqumminut tunngavilersuummini allappoq.
Taassuma apeqqutigaa meeqqat inuusuttuaqqallu unammersuarneri sooq aallakaatinneqartannginnersut aammalu aallakaatittalersinnaanissaannut qanoq pilersaartoqarnersoq.
- Isumaqarpunga meeqqat unammersuarneri TV-kkut Radiokkullu aallakaatinneqartarnissaat pingaaruteqarluinnartoq, nunatsinnimi pisut pingaartumik meeqqat inuusuttuaqqallu unammersuarneri annertuumik nukippassuillu atorlugit sungiffimmi suliniarnermik ingerlanneqartarput. Nunatsinni pissutsinut malinnaanissaq soqutigineqanngitsutut ittoq piffissangorpoq aaqqiivigineqarnissaa, Jens Immanuelsen oqarpoq.