Slettemark unammisaqattaarnerni aallartilluartoq

19-inik ukiulik Sondre Slettemark sisorarluni unammisaqattaarnerit aallartilluarpai. IBU Cup Sverigemi sapaatip akunnerata naanerani ingerlanneqarmat, tallimanngornermi aamma arfininngornermi 20-ulluni aamma 22-ulluni apuuppoq. Sondre Slettemark juniorini ukiuni marlunni suli unammisartuuvoq, ooqattaasarnermili seniorit maanna unammillersinnaalereersimavai.

Unamminerni marlunni siullerni 10 kilometerinik ujakkaarfissaqarpoq, ooqattaasarfiillu marluullutik, Grønlands Biathlon Forbund ilisimatitsivoq.

Pitsanngoriaateqarsimasoq

Sondre Slettemark uanmminerit aallartillugit uniunngivilluni ooqattaasarpoq, ajugaasumiillu 1 minut aamma 40 sekundit kingulliulluni tikiulluni. Unamminerup aappaani uniornerit marluupput, ajugaasumiillu 2 minutsit sinnilaarlugit kingulliugami nr. 22-tut inissippoq.

Unamminerit marluk naammassineranni Sondre Slettemark malersuulluni ujakkaarnermut seniorini annguppoq. Sapaammilu malersuulluni unamminermi ooqattaarfissani pingasuusuni ataasiaannarluni uniorpoq, nr. 27-tullu inissiluni.

Angusat siornarnit pitsaanerungaatsiarput.

- Unamminerni pingasuni angusakka iluarisimaarnarilluinnarpakka. Siornamiit angusarissaarnerulluinnarpunga, siornami maani Idre, Sverigemi unammigatta nr. 70, 66 aamma 68 inissiffigaakka. World Cupimi unamminerni sapaatip akunnerata siuliani ujakkaarfinni pitsaanerpaat sukkaqatigiinnarpakka, qummukajaanili kigaanneruinnarlunga.

Ujakkaariaaseq pitsaanerusoq

- IBU cupimi nunarsuarmi ujakkaallaqqinnerpaat sukkaqatigiinnarpakka, qummukajaanili aamma katataasarlunga. Takusinnaalluarpara sutigut pitsanngoriassanerlunga pitsaanerpaanut inissikkusukkuma, unammillernartulli qunuginngivippakka, Sondre Slettemark oqarpoq.

Sondre Slettemark IBU Cupimi inaarutaasumik inissikkallarfinni nr. 29-inngorpoq.