Snowbordertartut pikkorissut
Nuummi ukioq manna Freestyel & Snowboardimi Kalaallit Nunaanni pissartanngorniunnerit sisamanngornermi illernartumi ingerlanneqarput, unammissut Slopestyel ingerlanneqarluni. Pikkorussusiallu tupinnaqaaq, naliliisut ilaat oqarpoq.
Pikkorissusiat tupinnaannarpoq, pingaartumik Snowboardertartut ilarpassuini aamma skiierit pikkorinnersaanni amerlanngitsuni.
Ullumikkut Slopestylemi unamminerni ullaap tungaa warm up aamma anngunniunnerit ingerlanneqarput.
Tamatuma kingorna finalet pilersaarutit malillugit nal. 15.00 aallartinneqarput, sila nuiavoq, qaqqamiit anorsaataarluni. Taamaanneranik riderit arlallit sukkassuseq tunnerillu ajornartorsiutigaat, kickerillu naanaartarlugit, assumut anoreqangaatsiarmat.
Nuummi Slopestylemi unammiffik sapaatip akunnerata kingulliup ingerlanerani aatsaat sananeqarsimavoq, taamaattumik riderit ulloq unammiffik aallartimmat aatsaat unammiffimmi sisusinnaatitaalersimapput.
Unammiffik Rail-imik 7 meterimik aallartippoq, tulliullugu step down hoperfik 6 meteri. Taava tulleraa hip/quarterpipe, tassanngaaniillu flatbox imaluunniit downbox toqqarneqarsinnaapput, naggataarutaalluni kicker (14 meteri silaannarmiiffeqangaatsiartoq (airtime).
- Ullumikkut unamminerni pikkorussuseq qaffasissoq takusimavarput, pingaartumik boarderertarluni, Kalaallit Nunaanni sisorartartut kattuffiata ataani Freestyle & Snowboardip ataatsimiitsitaliaani siulittaasoq Jens Olsen oqarpoq.
- Riderit aappaagumiit Nuummi aalajangersimasumik snowparkeqalernissaanut qilanaaraagut, sææsoni tamaat sungiusarsinnaalissagamik. Tamanna timersuummik soqutiginninnerulersitsissaaq, aamma qaffasissusia suli qaffaallannerussaaq, Jens Olsen oqarpoq. Taassuma aamma nuannaarutigaa ukiunut siuliinut sanilliullugu ukioq manna arnat peqataasut amerlanerummata.
Slopestylemi inersimasut pisortatigoortumik Kalaallit Nunaanni 2009-mi pissartanngortut tassaapput:
Snowboard: Michael Damgaard
Freestyleski: Emil Brandt Olsen
Ullumikkut unamminermi riderit 35-it peqataapput.
Tallimanngorneq tannaartumi pissartanngorniunnerni unammissutigineqassapput Boarder/SkiierCross, arfininngorpallu unammissutigineqassaaq Big Air.
Sapaatiuppat unammeriaatsit assigiinngitsut takutitsinerullu ingerlanneqassapput, taavalu "Ukiup Skiier-ia 2009" aamma Ukiup Boarder-ia 2009" toqqarneqassallutik.