Sondre angusarissaarpoq - Ukaleq unammeqataanngitsoq
Qatanngutigiit Sondre aamma Ukaleq Slettemark inuusuttut sisoraaserlutik ooqattaasarnermi nunarsuarmi pissartanngorniunneranni naggammik unammeqataapput. Sondre pitsaanerit 30-t akornanni inissippoq, Ukaleq unammeqataaniarnani aalajangertoq.
Sisoraaserlutik ooqataasartartut Ukaleq aamma Sondre Slettemark inuusuttut sisoraaserlutik ooqattaasarnermi nunarsuarmi pissartanngorniunnermi peqataanerminni naggammik unammeqataapput sapaatiummat.
Unammissutigineqartoq tassaavoq 10 kilometerimut jagtstart, tassani ooqattaasarfiit sisamat seqqorfigissallugit.
30-t akornanni inissittoq
17-nik ukiulik Sondre Slettemark U18-ni peqataasoq, naggataamik unammeqataanermini takutitsilluarpoq.
Peqataasuni 60-iusuni 26-attut inissippoq. Katillugit 20-riaq seqqornermini pingasoriarluni eqqoriakkani uniorpai. 10 kilometerit atorpat minutsini 32-ni sekundillu 30-it. Nunarsuarmi pissartanngortumit Slovakiamit Jakub Borgulamit minutsit sisamat sekundillu pingasut arriinnerulluni.
Ukaleq unammeqataanngitsoq
Ukaleq Slettemark 10 kilometerimut unamminissamut peqataaniarnani aalajangerpoq.
Facebookimi quppernermini ilaatigut ima allappoq:
- Sivisuumik angalareerlunga qasulluinnarpunga, taamaattumik unammeqataaniarnanga aalajangerpunga. Angerlarnissara qilanaaraara, tassani Holmenkollenimi World Cup-eqataanissannut sungiusassallunga. Neriuppunga nukissanik nutaanik nassaassallunga.
Taamaasilluni inuusuttut VM-erneranni ima angusaqarput:
Sondre Slettemark:
12,5 kilometer individuel: 33-itut inissippoq
7,5 kilometer sprint: 20-itut inissippoq
10 kilometer jagtstart: 26-itut inissippoq
Ukaleq Slettemark:
12,5 kilometer individuel: 19-itut inissippoq
7,5 kilometer sprint: 51-itut inissippoq
10 kilometer jagtstart: Peqataanngilaq