Sondre EM-imi normu 4-ngorpoq
Slettemarkip sisoraatinik ooqattaasarnermi unammisartup aappaa, Sondre Slettemark, Europami inuusuttut sisoraatinik ooqattaasarnermi pissartanngorniunneranni Polenimi ingerlanneqartumi sisamaattut inissippoq.
Ooqattaasartoq kalaaleq, Sondre Aputsiaq Slettemark 19-inik ukiulik, ujaminnanngitsoorpoq, kisianni Europami pissartanngorniunnermi kingullermi normu 4-nngorpoq. Arpannermi 12 kilometerisut isortartutigisumi eqqoriagassanit tallimaasunit sisamat eqqorpai.
- Sondre 12 kilometerimut arpannermi sukkanerpaat tulliattut inissippoq, 4-2-4-4-mik taakkunani sisamani eqquilluni. Apuuffissaminut apuukkami normu 4-nngorpoq, normu 3-mit sekundinik tallimanik kigaannerulluni, Kalaallit Nunaanni Biathlonertartut Kattuffiat tusagassiuutinut nalunaarummi allappoq.
- Soorunami angusaq naammagisimaaqaara. Sisoraatinik oqilaniunnera immaqa misilittakkama pitsaanerpaat ilagaat. Aallartinnissaq sioqqullugu nukillaangakujuppunga niaqorloqqaarlungalu, taamaattumik ilimaginngikkaluarpara taama ingerlalluartigissallunga. Kisianni aallartikkama ingerlaannaq ingerlalluartutut misigaanga, Sondre Slettemark arpannini pillugu oqaluttuarpoq.
Silarluttoq
EM-imi unamminerni siullerni marlunni, sukkasuumik 10 kilometerimut marlunnik eqquinermi aamma 15 kilometerimut sisamanik eqquinermi, Sondre Slettemark normu 39-tut aamma normu 23-tut inissippoq.
Naggataarutaasumik ataatsimoorluni aallartinnermi sila ajorluinnarpoq siallerlunilu aput aqimmat, tamannalu unammisartunut ilungersunartorsioreersunut unammillernartuuvoq.
Aallartinneq sakkortugaluartoq Slettemarkip periaasiulluartoq ingerlallualersitsisoq nassaaraa.
- Pingajussaanik arpanninni sukkanerpaavunga, arpannermilu kingullermi arpattartut sisamat qaangerpakka. Tamanna pitsaalluinnarpoq, aammali uggornaqaaq aappassaanik eqqoriaanera ajorluinnarami, pingasoriarlunga uniorama, taamaalillungalu pillagaallunga. Pillagaaneq tamatigut sekundit 25-t missaanni akeqartarpoq, oqarpoq nangillunilu:
Ujaminnannginnini uggoraa
- Taamaattumik ujaminnanngilanga kuultinnannangalu. Soorunami tamanna uggornarpoq, kisianni timersorneq taamaappoq. Nuannaarutiginerpaavara sisoraatinik oqilaniunnermi pitsaanerpaat ilaanniillungalu ooqattaasarneq pitsaasoq arpalluarnerlu ataqatigiississinnaagukkit ajugaasinnaagama, Sondre Slettemark oqarpoq.
Biathlonertartut Kattuffiat ilisimatitsivoq Sondre Slettemark februaarip naanerani Estlandimi inuusuttut nunarsuarmi pissartanngorniunneranni peqataassasoq.