Sondre norskit pissartanngorniunneranni guldinnattoq
Norgemi ujakkaarluni ooqattaasarnermi pissartanngorniunnermi Sondre Slettemark pissartanngorpoq. Sprintimi aamma angusarinnerpaat pingajuattut inissilluni bronzennappoq.
Norgemi ujakkaarluni ooqattaasarnermi sapaatip akunnerata naanerani pissartanngorniuttoqarmat, Sondre Slettemark nunanit allamiuni siullersaalluni ujakkaarluni ooqattaasarnermi unammersuarnerni Norgemi guldinnappoq.
Stafetimi iligisanilu unamminermi, Sondre Slettemark siulliulluni ingerlaarpoq, ooqattaasarnermilu uniunngivilluni.
- Unammeqataanera iluarisimaaqaara. Ooqattaasarnermi uniunngiivippunga, ingerlaarfimmilu aamma ingerlalluarlunga. Siulliullutik ingerlaartuni siulliup tulliullunga apuuppunga. Unammeqatikka aamma ingerlalluaqaat, taamaasilluta Norgemi pissartanngorpugut, Sondre Slettemark tusagassiorfinnut nalunaarummi oqarpoq.
Norskit ooqattaasartartut kattuffiata pissartanngorniunnerni inatsisit allanngortissimavaat. Nunanit allamiut Norgemi najugaqartut, norskit sisorartartut peqatigiiffiini ilaasortaagunik, pissartanngorniunnerni guldinnassinnaalersinneqarput. Taamaasilluni Sondre Slettemark norskiunngitsuni siullersaalluni pissartanngorniunnermi guldinnappoq.
Aamma bronzemik angerlaassissaaq
Sondre Slettemark Grønlands Biathlon Forbund naapertorlugu arfininngornermi sprinterami aatsaat taama ingerlalluartigaaq.
- Nallangalluni ooqattaasarnerni uniunngiivippoq, nikorfallunilu ooqattaarinermi ataasiaannarluni uniorluni. Ingerlaanermi siulliit pingajuattut inissippoq, angutini 18-inik ukiulinni aallaqataasut 51-it akornanni, kattuffik allappoq.
Sprintimi taamaasilluni bronzennappoq.
- Ineriartornera iluarisimaarpaara norskillu pissartanngorniunnerani angusakka naammagalugit. Ukiaq sungiusarnera kipisaqattaartariaqarsimavoq napparsimasarnikka pissutigalugit. Angusakkali januarimi pitsaanerulerput, Sondre Slettemark oqarpoq nangillunilu:
- Naammagittarsimavungali ukiuuneranilu sungiusarluartarlunga. Junior VM-imi angusinnaasakka pitsanngoriarput Norgemilu pissartanngorniunnerni angusarissaarlunga.
Angusinnaasani allanngortinnagit maanna European Youth Olympic Festivalimi Finlandimi sapaatip akunnerata tulliani ingerlanneqartussamut sungiusassaaq.