Sondre Slettemark VM-imi angusarissaarpoq
Sondre Slettemark inuusuttunut 10 kilometerimut sisoraaserluni ooqattaasarnermi VM-imi aqqaneq-aappaattut inissippoq.
Sapaatip-akunnerani matumani qatanngutigiit Slettemarkikkut marluk, Sondre aamma Inuk, Estlandimi inuusuttut inuusuttuaqqallu ooqattaasarneranni VM-imut peqataapput.
Pingasunngormallu Sondre Slettemark aqqaneq-aappaattut inissippoq, taama Kalaallit Nunaanni Biathlonertartut Kattuffiat nalunaarpoq:
- Pingasunngormat 10 kilometerimut arpannermi Sondre aqqaneq-aappaattut inissippoq, ooqattaasagassani quliusuni ataasiaannarluni uniorami, arpattunilu sukkanersaat aqqaneq-aappaattut inissikkami. Taamaalilluni Norgemiut sisamat akornanni marluk, tyskit sisamat akornanni pingasut, franskit sisamat akornanni pingasut minnerunngitsumillu svenskit tamaasa ajugaaffigai, kattuffik allappoq.
Qoorortuua aserorpoq
Aamma arpannerni marlunni allani Sondre sukkasuumik arpappoq. 15 kilometerimut arpannermi sisamariarluni ooqattaasagassalimmi sukkanerpaat 16-iattut inissippoq, 20-nilli ooqattaasagassani arfineq-pingasut unioramigit tamanna angusarissaarluarneranut ajoqusiivoq.
VM-imut anngunnikut 60-it pitsaanerpaat naggataarutaasumik ataatsimoorlutik aallartinneranni aallaqqaammut ingerlalluaqaaq, taavali pingajussaanik ooqattaasareerluni nammaatap sakkuatalu akornanniittoq aserorpoq, pakatsingaarlunilu arpannini unitsittariaqarpaa:
- Nakkaqqaqaanga, maannami sungiusarsimalluarama, aamma arpannermi angusarissaarsinnaagaluarama.
- Qummukajaani pitsaanerpaanut ajorsartarpunga, kisianni aqqutip sinnerani uannit sukkanerusumik arpattoqanngilaq. Naak pisoq ajorluinnaraluartoq VM-ernera naammagisimaarluinnarpara. Siornamiit annertuumik alloriangaatsiarpunga.
Inuk napparsimasoq
Inuk Slettemarkimut VM pilersaarutit malillugit ingerlanngilaq, arpanneq siulleq sioqqullugu toqunartulimmik nerigami, taamaattumillu peqataasinnaanani.
Sukkasuumulli arpannermi peqataavoq, ooqattaasagassaniillu quliusunit ataasiarluni uniorpoq, peqataasunillu 104-sunit normu 59-itut inissilluni.
- Tamanna pitsaasuuvoq, kisianni napparsimanani piareersarsimasuuguni qularnanngitsumik pitsaanerusimassagaluarpoq, Kalaallit Nunaanni Biathlonertartut Kattuffiat allappoq.