Suloranermi ujamerpassuit
Sequssuna Fleischer Schmidt sulorarnermi pingasoriarluni qultinnappoq. Assit takukkit timersuutinilu allani inernerit.
Kalaallit sulorartartut 15-inik ujaminnapput. Taakkunannga arfineq marluk gultiupput, tallimat sølvit pingasullu bronzit. Seqqussuna F. Schmidt juniorini angajullerni pingasoriarluni pissartanngorpoq, kisimiilluni, marlukkaarluni arnat angutillu kattullutik unammineranni ajugaagami.
Aamma Arctic Winter Gamesimut aallanginnermi siunertaavoq peqataasut tamarmik ujaminnannissaat.
– Angusagut nuannaarutigeqaavut, aamma Sequssuna Fleischer Schmidt pingasoriarluni pissartanngormat kusanaqaaq, sulorarnermi nunanut allanut unammisartut sungiusaasuat Bjarne Nielsen Sermitsiaq.ag-mut oqarpoq.
Ujakkaarneq
Ujakkaarnermi stafetimik unammisoqarpoq, tassanilu Johannes Olsvig, Aqqalu Sandgreen aamma Angutitsiaq Lynge juniorini inuusunnerni bronzennapput. Aamma pingasoriarluni 5 kilometerimik arpattoqarpoq. Tassani Yukon gultinnappoq saamillu sølvinnallutik.
Juniorini inuusunnerni Navarana Davidsen, Camilla L. Hansen aamma Amalie Borup holdini arfiniliusuni nr. 4-ngorput, Alaskamiut sølvinnallutik Nordvestterritoriamiullu bronzennallutik.
Juniorini angajullerni nivissat nr. 5-ngorput. Kalaallit unammisui tassaapput Nadia Olsen, Ajaaja Sandgreen aamma Malu Olsen. Unammineq Ruslandimi nunap immikkoortuanit Yamalimit ajugaasoqarpoq, Albertamiut sølvinnattut Alaskalu bronzennalluni.
Nukappissat juniorit angajulliit nr, 4-ngorput. Unamminermi saamit ajugaapput, Yamal sølvinnattoq Alaskalu bronzenalluni.
Isikkamik arsaanneq
Juniorit nukarliit unamminermi ujaminnanngillat, naak unammiuaarnerni aallartilluaraluarlutik. Semifinalimi Yukonimut 2-3-mik ajorsarput, naak unamiuaarnerit aallartinneranni 3-2-mik ajugaaffigisimagaluarlugit.
Juniorit nukarliit Albertamut tallimanngormat unnukkut bronzeanniunnermi 0-1-mik ajorsarput. Unammiuaarnerit aallartinneranni Albertamut 3-1-imik ajugaagaluarput.
Juniorit angajulliit ajugaaniutivinnissamut anngupput, tallimanngormat semifinalimi Yukon 2-0-imik ajugaaffigigamikku. Finalimi Alberta unammisussaavaat, unammiuaarnerit aallartinneranni 2-3-mik ajorsarfigisartik.
Nerrivimmi arsaararneq
Nerrivimmi arsaararnermi juniorini inuusunnerni unammisartoq Maren Jensen tallimanngormat ujaminnannissaq qulakeerpaa, arnat ataasiakkaarlutik unammineranni gultinnakkami. Sivert Olsen juniorini nukarlerni ataasiakkaarluni unamminermi bronzennappoq.
Anders Jensen aamma juniorini angajullerni ataasiakkaarluni unamminerni bronzennappoq.