Sulorarnermi EM: Kalaallit Sverigemut Tulunnullu ajorsarput
Kalaallit Nunaat sulorarnermi angutit iligiiaarlutik europami pissartanngorniunnermi peqataapput. Unammisartut aqagu naggammik unammissapput
Iligiiaarluni EM-ertoqarnerani kalaallit marlunngormat unammeqqaarput. Sverige-mut unamminermi 0-4-mik ajorsarput.
Ataasiakkaarnermi Taatsiannguaq Pedersen unamminermini 6-21-mik aamma 8-21-mik ajorsarpoq. Ataasiakkaarnermi unamminermi tulliuttumi Toke Ketwa-Driefer aamma unammivoq, tassani 7-21-mik aamma 13-21-mik ajorsarluni.
Marlukkaarnermi Jens-Frederik Nielsen Taatsiannguaq Pedersenilu unamminerminni 6-21mik aamma 11-21-mik ajorsarput. Sequssuna Fleischer Schmidt kiisalu Toke Ketwa-Driefer aamma svenskinut unamminerminni 14-21-mik kiisalu 10-21-mik ajorsaarlutik.
Sulorarnermi siuarsimanerpaat ilaannut Tuluit Nunaannut kalaallit ullumi unammipput.
Tupaallannanngitsumik 0-4-mik kalaallit ajorsarput.
Toke Ketwa-Driefer ataasiakkaarnermini 8-21-mik aamma 9-21-mik ajorsarpoq. Jens-Frederik Nielsen taamatuttaaq ajorsarpoq, arfineq marloraarluni aamma quleraarluni unamminermini.
Toke Ketwa Driefer kiisalu Taatsiannguaq Pedersen marlukkaarnermi unammeqatigiinnerminni 6-21-mik kiisalu 10-21-mik ajorsarput. Unammiffiusumi unammisut kingulliupput Jens-Frederik Nielsen aamma Sequssuna Fleischer Schmidt. Unammigamik ajorsarput 4-21-mik aamma 8-21-mik.
Estland aqagu sisamanngornermi unammissavaat. Tassani kalaallit unamminermi ataatsimi ajugaanissamut periarfissagissaarnerpaapput, tassami Estlandikkut unamminitik tamarmik ajorsarnikuuaat.
- Taamaattoq unamminerni ajugaanissanut ilimagineqanngilagut. Taamaattoq unammisartugut sapinngisatik tamaasa atorlugit angusarissaarniarsarissapput, nunanut allanut unammisartunut sungiusaasoq Rune Svenningsen Sermitsiaq.AG-mut oqarpoq.
- Uagutsinnit pitsaanerusunut unammisaqattaarpugut. Taamaattoq kalaallit unammisartugut sukataartuarput, ineriartorsimanerat takuneqarluarsinnaalluni. Naak unamminigut tamarmik ajorsaraluarlugit unammisaqattaarluarpugut, Rune Svenningsen oqarpoq.