Sulorartartut kattuffiat: Najukkani klubbit ukioq manna aallarteqqittut
Sulorarnermi nunatsinni pissartanngorniunnerni peqataasut aatsaat taama amerlatigaat, najukkanilu peqatigiiffit ukiuni arlalinni uninngasimasut aamma aallarteqqissimallutik. Nunanut allanut unammisartut kuultinik marlunnik aamma sølvimik ataatsimik ujaminnassimapputtaaq.
Timersortarfinni ketchers-inik sulorarneq ingerlalluarneqartarpoq, timersoqatigiiffiit unissimagaluartut pilerseqqinneqarput kiisalu, meeqqat inuusuttullu sulorarnermik nuannarisaqarnerujartorput.
Tamanna Sulorartartut Kattuffianni nuannaarutigineqarpoq. Sulorarnermi nunatsinni pissartanngorniuttoqarmat 100-t sinneqartut peqataasimapput, sulorarnerlu soqutigineqarneruleqqimmat klubbit unissimagaluartut aallarteqqissimapput.
- Kugsak-45 Qasigiannguaneersoq ukiorpassuarni peqataasimanani nunatsinni pissartanngorniunnermi ukioq manna peqataaqqippoq. Kattuffitsinni pingaarutilik tassaavoq siornatigut peqatigiiffiusimasut ingerlaqqilernerat, sulorartartut kattuffianni siulittaasoq Michael Kleist Sermitsiaq.AG-mut oqarpoq.
Island Gamesimi kuultinnanneq sølvinnannerlu
Sulorartartut peqatigiiffiat ilaasortarpassuaqalersimavoq, tamannalu peqatigiiffiup Facebookimi quppernerani takuneqarsinnaavoq, ukiup ataatsip ingerlanerani ilaasortat nutaat 200-t sinnerlugit ilanngussimapput.
Sulorartartut kattuffiata aamma nuannaarutigisinnaavaa Kalaallit Nunaannit sulorarnermi nunanut allanut unammisartut Island Gamesimi siullermeerlutik marloriarlutik kuultinnammata, taakkualu saniatigut sølvinnallutik.
- Angutit arnallu ataasiakkaarlutik unammineranni kuultinnanneq iligiiaarnermilu sølvinnanneq. Kalaallit Nunaanni siullermeerluni unammiuaarnermi tassani angutit arnallu ataasiakkaarlutik unammineranni marloriarluni kuultinnattoqarlunilu iligiiaarluni unamminermi finalertoqarpoq. Aammattaaq pingaarutilik eqqaamaneqassaaq, tassa Kalaallit Nunaanni siullermeerluni arnat ataasiakkaarlutik unammineranni kuultinnattoqarnera, kattuffik ilisimatitsivoq.
Sulorarneq atuarfimmi sammineqalissaaq
Kattuffiup najukkani timersoqatigiiffiit ukiumi nutaami ineriartortinniarpai, taamaalillutik piginnaasaqarnerusut sulorarnermik sammisaqarsinnaaniassammata. Kattuffik ukiumi nutaami anguniakkanik pingasunik pingaartumik suliniuteqarniarpoq, ilaatigut sulorarneq atuarfimmi sammineqartalernissaa anguniassallugu.
Anguniakkat tassaapput:
- Sulorarneq najukkani atuarfinnilu siammarneqassaaq pitsanngorsarneqarlunilu, atuarfimmilu aaqqissuussaq „Shuttle Time“ Badminton World Federationimit aaqqissuunneqartoq atuartitsissutitut atorsinnaasunngortinneqassaaq.
- Sulorartartut ineriartortinneqassapput, ilaatigut Danmarkimi nunanilu allani unammiuaarnerni peqataanermikkut (assersuutigalugu AWG-mi, Small States of Europe Badminton Team Championship-imi) kiisalu nunanut allanut unammisartunut sungiusaasoq peqatigalugu sungiusarnermikkut.
- 2023-mi sungiusaasunut pikkorissartitsineq sungiusaasunut pikkorissartitsinerit ingerlanneqareersimasut tunngavigalugit inerisaasoqassooq, taamaalilluni timersoqatigiiffinni sungiusaasut ineriartortinneqassallutik, sakkussanillu amerlanerusunik nutaanik tunineqassallutik.