TAAK: Nunarsuarmi pissartanngorniuttoqarnerani meeqqat amerlanerusut assammik arsartalerput
Nunanut allanut unammisartut VM-imut anngunnerat, VM-imilu unammeqataanerat pissutigigunarlugu, meeqqat amerlanerusut assammik arsarnermik soqutiginnilerput. Peqatigiiffit meeqqanik amerlanerusunik ilaasortaqalersimapput, TAAK-imilu siulittaasup tamanna nuannaarutigaa.
Assammik arsarneq - pingaartumik arnat nunarsuarmi pissartanngorniunnissamut anngunniunnerisa kingornalu VM-imut peqataanerat pissutigalugit - soqutigineqarluinnalerpoq.
Assammik arsartartut kattuffianni TAAK-imi siulittaasoq Carsten Olsen taama oqarpoq.
- Nuummi meeqqat pissartanngorniunneranni meeqqat nalinginnaanngitsumik amerlaqaat, tamannalu nuannaarutigeqaarput. Nuannaarutigeqaarput meeqqat illoqarfinnit assigiinngitsuneersut peqataammata. K-33 holdinik pingasunik peqataatitaqarpoq, Maniitsoq aamma holdinik amerlasuunik peqataatitaqarluni. Maluginiakkani taakku taasariaqarput, ukiormannalu tamanna ineriartornernut pitsaasunut ilaavoq. Meerarpassuit assammik arsartalernissaat kissaatigaarput, Carsten Olsen oqarpoq.
Assammik arsartartut kattuffiat nalunaarpoq arnat nunanut allanut unammisartut anngunniunnerni nunarsuarmilu pissartanngorniunnerni maluginiarneqarnerat pissutigalugu innuttaasut amerlanerusut assammik arsartartut peqatigiiffiinut ilaasortanngorniarlutik imaluunniit meeqqatik ilaasortanngortinniarlugit saaffiginnittartut.
Assammik arsartartut kattuffiata 2024-mi klubbinik ineriartortitseqataanissaq qilanaaraa.
Pisimasut pingaarutillit arlallit
Arnat nunanut allanut unammisartuinnaat 2023-mi VM-imut peqataaginnanngillat. Nunanut allanut unammisartut allat ukioq manna aamma pitsaasunik angusaqarput:
- Arlalinnik taasassaqarpugut. Nunatsinni nunarsuarmi pissartanngorniunnissamut anngunniutsitsinerput, nukappissat U20-t Grækenlandimi VM-eqataanerat, niviarsiaqqat U18-it 2024-mi Kinami VM-ertoqarnissaanut anngunnerat, soorunamilu arnat nunanut allanut unammisartut, tapersersuisut peqatigalugit, VM-imi takutitsilluartut.
- Immikkut maluginiarnarnerpaagunartoq tassaavoq nunatsinni pissartanngorniunnissamut anngunniunnerput, kajumissutsiminnik sulisut nuannersunik avatangiiseqartilluta nunalu tamakkerlugu arnat nunanut allanut unammisartut VM-imut anngunniunnermi pissanganartupilussuarmi tapersersorneqarlutik, nunanut allanut unammisartut eqqissisimalluinnarlutik unammilluarmata, Carsten Olsen oqarpoq.
Ukiumut nutaamut naatsorsuutit
VM-imut anngunniunnerit Nuummi ingerlanneqartut piffissartornarlutillu aningaasartornarsimapput, ukiulli ataatsip ingerlanerani nunani tamalaani unammiuaarnerit arlallit takutippaat Kalaallit Nunaat nunani tamalaani assammik arsartartut unammiuaarnerinut peqataasinnaasoq:
-Nunatsinni assammik arsartartut amerlinissaat kissaatigaarput, assammik arsartarneq klubbillu ineriartortikkusuppagut, TAAK-imi siulittaasoq oqarpoq.
2024-mi anguniagassatut pingasut eqqaavai:
- Nunanut allanut unammisartunut sungiusaasut nuna tamakkerlugu maluginiarneqarnerulertariaqarput
- Angutit nunanut allanut unammisartut nukappiaqqallu U18-it VM-imut anngutsikkusunneqarput
- Niviarsiaqqat U18-it Kinami VM-ertoqarnissaanut pitsaanerpaamik angusaqarnissaat
Nammineq kajumissutsimik ikiuuttut peqanngippata assammik arsartarneq ingerlaannariaannaanngitsoq aamma eqqaaneqarpoq:
- Kajumissutsiminnik sulisut tassaapput sapiitsuliortugut. Nersualaarneqartariaqarput. Ulluinnarni tapersersoqatigiittariaqarput, taamaasillutik timersortartut toqqissisimanartumik avatangiiseqartissinnaaqqullugit, Carsten Olsen oqarpoq.