Island Games
Taamatut! Angutit iligiiaarneranni kalaallit kuultinnapput
Island Gamesimi badminton-ernerluni angutit iligiiaarlutik unammiuaarneranni Jens-Freerik Nielsen Bror Madsenilu unammilluarnermik kingorna kuultinnapput - video takuuk
Kalaallit Nunaat Island Gamesimi, Jerseymi ingerlanneqartumi, medalje-naqqaarpoq.
Medalje kusanarnerpaaq, kuulti pissarsiarineqarpoq, badmintonimi angutit iligiiaarlutik unammiuaarneranni Jen-Erik Nielsen Bror Madsenilu finalimi ajugaammamata.
Finalimi Menorca-meersut sæt-it marluk atorlugit 21-17 aamma 24-22-mk ajugaaffigaat.
– Ajugaanerput uppernarpianngilaq. Sæt-ip aappaani kinguangaatsiarsimavugut, angusaavugulli. Nuanneqaaq, kuultinnattoq Jens-Frederik Nielsen Sermitsiaq.AG-mut oqarpoq.
Bror Madsen inuiattut erinarsuutip atorneqarnerani killitsippoq
Unammiuaarnermi iligisaa, Bror Madsen, Island Gamesimi iligiiaarluni unamminermi aappassaa kuultinnattoq, killitsippoq, Kalaallit Nunaata inuiattut erinarsuutaa ´Nunarput Utoqqarsuanngoravit´ atorneqarmat.
– Augaanersikornermi inuiattut erinarsuuterput atorneqarmat killitsittorujusuuvunga. Inuiattut erinarsuut tusarlugu tamatigut killitsinnartarpoq. Nuanneqaarli ajugaagatta, aammali unammisarnitsigut siuariartorsimaqigatta, kuultinnattoq nuannaaqisoq Bror Madsen Sermitsiaq.AG-mut oqarpoq.
Aamma sungiusaasoq nuannaaqaaq
Bror Madsenip Jens-Frederik Nielsenillu taktikkiat ingerlalluaqaaq, nunanut allanut unammisartut sungiusaasuat Rune Svenningsen oqaluttuarpoq.
– Taakku (Bror Madsenip Jens-Frederik Nielsenillu, aaqqiss.) ajugaanerat tipaatsunnaqaaq. Tamanna anguniarlugu sulisimavugut. Finalimut piareersarluarsimavugut, taktikkilu ingerlalluarpoq, nukappissallu finaleruaqaat, Rune Svenningsen oqarpoq.