Golden Arm
Talermittartut nunat tamalaat unammersuaarneranni peqataassapput
Nuummi talerminnermik peqatigiiffiit marluk Sverigemi talerminnermik unammisaqarnerani peqataassapput
Timersornermik peqatigiiffiit Nuummeersut, Nanoq Pullers aamma The Inuit Warriors, Sverigemi illoqarfimmi Eskilstunami talerminnermik nunat tamalaat peqataaffigisaannik unammisartunik peqataatitsissapput. Nunanit assigiinngitsuneersut tassani aamma peqataassapput.
The Inuit Warriors suli pisortatigoortumik peqatigiiffinngunngilaq, pappiliarsornerilli ingerlasut Mikkel Andersenip oqaatigaa, taanna aamma unammersuarnermi peqataassaaq.
Mikkel Andersen saniatigut Nanoq Pullers sinnerlugu peqataassapput Minik Sune Trondheim, piginnaanilittut 2014-mi Kommuneqarfik Sermersuumit toqqarneqartoq, Gerth Poulsen, Malik Frederiksen Motzfeldt aamma Jan Mikael Heilmann, sungiusaasorissavaallu Jørgen Petersen.
Nunarsuarmi pissartanngorniunnernut peqataarusupput
Nanoq Pullers, sapaatip akunneranut ilaatigut arfinileriarlutik sungiusartartut, annertuumik ukioq manna pilersaaruteqarpoq.
- Pilersaarutit ajunngitsumik ingerlassappata nunarsuarmi pissartanngorniunnernut peqataatitaqarnissarput siunnertaraarput, tusagassiutinut nalunaarummi allapput.
Minik Sune Trondheim Johansen aamma Lars Jørgen Petersen oqimaassutsiminni unamminerminni DM-imi kuultinnapput ukioq kingulleq.