Tassa pisussanngorpoq: Kalaallit Nunaat ukiuni 22-ni peqataasimanani VM-imi unammilerpoq
Kalaallit Nunaannit arnat assammik arsarlutik nunanut allanut unammisartut VM-imi ukiuni 22-ni peqataasimanatik, ullumi unammisussanngorput. Unamminermi siullermi vm ammaanersiorlugu Norgemut unammissapput.
Arnat kalaallit assammik arsarlutik nunanut allanut unammisartut akunnialuit qaangiuppata vm-imi unammeqataassapput, unamminermilu siullermi Norgep unammisartui naapissallugit.
Nalunaaqutaq 20.30, tassa nunatta nalunaaqutaa malillugu nal. 17.30 Norgep Kalaallit Nunaatalu unamminerat Stavangerimi DNB Arenami aallartissaaq.
Kalaallit unammisartut anngunniunnerit Nuummi junimi ingerlanneqarmata, unammisaminnut ilisimaneqartutut ajorsarsimanngivipput.
Anngunniunnerni ajorsarsimanngitsut
VM-ernissamut aqqut imaannaasimanngilaq.
Kalaallit Nunaat vm-imut anngunniunnerni junimi ukioq manna unammiffiuvoq, Inussivillu kalaallinik illersuisunik ulikkaavittarsimalluni. Unamminerit ilungersunarsinnaagaluartut Kalaallit Nunaat unamminerni siullerni sisamaasuni tamani ajugaavoq.
Unammillertut siulliit tassaapput Canada. Mexico, USA aamma Cuba unammineqarput, NACHC-mili anngunniunnerni kalaallit pissartanngorput.
Sapaatip akunnera unamminernik arlalinnik misilittarfioreersoq Kalaallit Nunaat Canadalu finalemi 11. juni 2023-mi unammipput.
Kalaallit Nunaat unamminermi akersuulluinnarpoq, unamminerullu unillatsiarnerani kalaallit kinguaqqalersimagaluarput. Unamminerup naammassinissaanut sikuntialuinnanngortut kalaallit isertitseqqipput, Canadamullu taamaasillutik 17-15-imik ajugaallutik vm-imut anngullutik.
Unammisussanik isiginnaariat qiimaqisut Norgeliartut
Inussivimmi angerlarsimaffinnilu junimi unamminerit kingullersaat isiginnaarneqarnerani misigissuseq arlallit immaqa suli eqqaamassavaat.
Isiginnaartut nuannanneranni Inussivik nippalluinnarsimavoq.
Unamminissami ullumi, aammalu Sydkoreamut Østrigimullu ullut tulliini unamminissani, kalaallit isiginnaariartut issiavissaat immikkut akuersissutigineqarsimasut 180-iusut tamavimmik pisiarineqareersimapput. Ilisimaneqartutullu kalaallit suli amerlanerit Kalaallit Nunaanniit Danmarkimiillu DNB Arenami isiginnaariarnissamut inniminniisimapput.
Kunngikkormiut aamma illersuipput
Kalaallit Nunaannit arnat VM-imi ukiuni 22-ni peqataasimanatik maanna unammersuarnermi peqataalerpata illersuisussaaleqissanngillat.
Kunngissaq Frederik, danskit kunngikkormiui sinnerlugit Kalaallit Nunaata nunanut allanut unammisartui ingerlalluarnissaanik kissaappai.
- Arnat assammik arsartartut nunarsuarmi pissartanngorniuunnissamut aqqutaat torraqaaq. Anngunniuunnermi unamminerit tallimaasut tamaasa ajugaaffigivaat, kalaallit sukataarlutik ajugaarusussuseqarnerat kusanartumik inerneqareerpoq. Malinnaaffiginissaat pissanganarpoq, Kunngissaq Frederik allappoq.