Timersoqatigiiffilerisoq: Nunarput nunat tamalaani timersornikkut takutitsilluarpoq
Assammik arsartartut, sulorartartut, ooqattaasartartut, futsalertartullu taekwondortartullu. Timersuutini assigiinngitsuni timersortartut ukioq manna nunani tamalaani unammisaqattaangaatsiarput, tamannalu Elite Sport Greenlandip nuannaarutigaa.
Timersoqatigiiffiit assigiinngitsut 2023-mi angusarissaarsimapput, tamannalu Elite Sport Greenlandip nuannaarutigaa.
Peqatigiiffiup timersornerit soorlu sulorarneq, futsalimi arsaattarneq, ooqattaasarluni sisorartarneq, taekwondo minnerunngitsumillu assammik arsartarneq, nunani tamalaani unammiuaarnerni takutitsilluarsimaneri eqqaavai.
Assersuutigalugu ukiumi matumani Lars Lennert Abelsen taekwondomi VM-imi bronzennappoq, qatanngutigiillu Ukaleq aamma Sondre Slettemark ooqattaasarnermi sisoraatinik oqilaniunnermi unammilluarlutik.
Nunat tamalaani unammeqataasinnaaneq kalaallit timersortartuisa iluaqutiginerpaasaraat, Elite Sport Greenland naliliivoq:
- Timersortartut amerlanerusut unammillernartunik amerlanerusunik periarfissaqarunik ineriartornissaminnut iluaqutigisinnaavaat, avatangiisillu eqqortut tamanna tapersersorsinnaavaat. Timersortartuutigut nunanut allanut unammisarnerminni piginnaasaminnik annertusaasinnaapput, Elite Sport Greenland naliliivoq.
Nunarsuarmi pissartanngorniunnerit arlallit
Tupinnanngilaq Elite Sport Greenlandip assammik arsartartut aamma timersuummi tamatumani angusat maluginiartarmagit. TAAK-ip arnat nunanut allanut unammisartut aamma angutit inuusuttut VM-imut aallartippai, niviarsiaqqallu inuusuttut Kinamut VM-imut anngunniunnissamut qulakkeerinneqqammerput.
ESG sulorartartut, KAK-p, TAAK aamma TAAK kiisalu Taekwondortartut kattuffianik ineriartortitsinissamut isumaqatigiissuteqarsimavoq. Timersortartut taakkua pitsaasumik ineriartortinneqarnissaannut iluaqutaasussanik ersarissunik sakkussaqarput:
- Timersortartut ineriartornerpaat ataatsimut ilisarnaatigaat ineriartorneq aaqqissuussaasumik ingerlanneqarmat ineriartortitsinermilu ersarissunik periusissiortoqarluni, ESG-mi siulittaasoq Nicolaj Christoffersen oqarpoq.
Ineriartornissamut periarfissaqarluarpoq
- Timersortartut pikkorissut 2023-mi angusaat Kalaallit Nunaata timersornerup silarsuaani annerpaanut peqataasinnaaneranut takussutissaalluarput, aamma takussaanerulersimanerat pissutigalugu neriuutigaarput inuusuttut periarfissanik takunnilissasut, timersornermilu soqutigisaminnik misiliinerulissallutik, ESG-mit oqaatigineqarpoq.
Peqatigiiffiup timersornerit assigiinngitsut ineriartortinneqarnissaannut periarfissaqarluartoq takusinnaavaa, ukiunilu aggersuni angusaqarluarnissaq qilanaarilereerpaa:
- Timersoqatigiiffiit isumaqatigiissutit aqqutigalugit tapersersortakkavut, soorlu taekwondomi nunanut allanut unammisartut, sulorarnermi nunanut allanut unammisartut, angutit futsalimi nunanut allanut unammisartut assammik arsarnermilu nunanut allanut unammisartut, tapersersorneqartuassagunik nunani tamalaani suli unammisinnaassuseqarlutik takutitsisinnaasariaqarput.
- Ukaleq Slettemark, Sondre Slettemark aamma Nuunu Chemnitz Berthelsen ukiut tulliuttut soqutiginarput, taakkumi tamarmik 2026-mi ukiuunerani OL-imut peqataanissartik annerusumik minnerusumilluunniit anguniagaraat. Tamanna isumaqarpoq maanna angusat suli pitsanngorsartariaqartut, taamaalillutik 2026-mi ukiuunerani OL-imut peqataanissamut piumasaqaatit naammassisinnaaqqullugit, ESG-mit oqaatigineqarpoq.