Timersortarfitoqarsuanngortut misissuiffigineqartussanngorput
Kalaallit Nunaat 2030-ip tungaanut nunarsuarmi timimik aalatitsinerpaatut inissinnissamik anguniagaqarpoq. Tamatumunnga pinnngortitaq aalanissamut ikiuutaalluartarpoq, taamaattorli peqatigiilluni timersortartunut atugassarititaasut pitsaajunnaavissimapput, Nunarpullu nunat tamalaat unammisarneranni qaaqqusisuusinnaanngilaq timersortarfiit naleqquttut amigaataammata.
Marlunngornermi Inatsisartut Naalakkersuisullu timersortartorpalaartumik oqallinnissaminnut piukkunnarsarsimallutik ataatsimiittarfimminni naapipput.
Tamanna pivoq Nivi Olsen (D) siunnersuuteqarmat arpattarfiit aammalu atletik atorlugu sungiusartarfiit allat nuna tamakkerlugu sananeqarsinnaanerinik periarfissanik misissuinissamik Naalakkersuisut peqquneqarnissaat pillugu Inatsisartunut aalajangiiffigisassatut siunnersuummik.
Naalakkersuisut siunnersuuteqartoq timersortartorpalaarlutik naaperiarpaat, tassami innersuussipput siunnersuut akuerineqassasoq, taassumalu qaavatigut misissuinermi aningaasartuutissat amerlanerunissaat ilimasaarutigaat sillimaffissatut, tassami arpattartut eqaarsaartartullu pitsaanerusumik atugassaqartinniarneqarnerisa saniatigut aamma timersortarfitoqarsuit allallu illuutit timersornermut atorneqartartut misissuiffiginissaat ilanngunneqassammat.
Timersortarfiit pioreersut siunissamilu timersortarfiit pisariaqartinneqartut nalilersorneqassapput
Naalakkersuisut siunnersuuteqartumut akissuteqaamminni erseqqissaapput inuunermut peqqinnarnerusumut innuttaasut suliniuteqarnerata nukittorsarnissaa siunertaralugu piffissamut 2023-2027-mut angusassat pillugit isumaqatigiissut Naalakkersuisut aamma Kalaallit Nunaanni Timersoqatigiit Kattuffiata atsioqatigiissutigisimagaat.
- Timersornermut atortorissaarutinik pioreersunik siunissamilu pisariaqartitsinermut misissueqqissaarnissap suliarineqarnissaa Naalakkersuisut aamma Kalaallit Nunaanni Timersoqatigiit Kattuffiata ilaatigut isumaqatigiissutigaat, timersornermut Naalakkersuisoq Aqqaluaq Biilmann Egede (IA) akissummini erseqqissaavoq.
Kommunimi timersornermut timigissarnermullu arlaqartunik assigiinngitsunik neqerooruteqarnermut kommunalbestyrelsi pingaarnertut akisussaavoq tamatumunngalu anguniakkanik tunngavinnillu aalajangersaassalluni. Timersortarfinnik sanaartornermut, iluarsaassinermut aaqqissuussinermullu Aningaasanut Inatsimmi siunertamut aningaasanik immikkoortitsisoqarsimappat Naalakkersuisut tapiissuteqarsinnaapput.
Qanorluunniilli ikkaluarpat, kinalu sumut akisussaagaluarpat, taamaattoq Naalakkersuisut Nivi Olsen siunnersuutaa pillugu isumaqatigaat.
- Naalakkersuisut maluginiarpaat aningaasanik killiliussat ½ million koruunit iluanni misissuineq suliarineqarsinnaasoq siunnersuuteqartup missiliorsimagaa. Naalakkersuisut naliliipput siunnersuutigineqartutut suliassaq annertutigisoq 1 million koruunit missaat tunngavigalugit aaqqinneqarsinnaassasoq, Aqqaluaq Biilmann Egede Naalakkersuisut sinnerlugit oqarpoq.
Siunnersuulli aalajangiiffigineqannginnermini ataatsimiititaliami suliarineqaqqaarallassaaq. Aappassaaneerinninneq pissaaq novemberip qulingani.