Tonny AWG-mi ujaminnanniaqqippoq
30-nik ukiulik Tonny Holm Fisker arfineq-pingajussaanik Arctic Winter Gamesimut peqataavoq
Tonny Holm Fisker, ulluinnarni Air Greenlandimi timmisartortartoq, Arctic Winter Gamesimi ujaminnaqqinniarsariniarpoq.
Unammeqataasarnermini arfineq-marlunni kingullerni 21-nik ujaminnattareerpoq, ukiut marluk matuma siorna Nuummi ujaminnaqattaarami arfinilinnik pissarsivoq, kuultit marluk, sølveq ataaaseq aamma bronzit pingasut.
- Ikinngutigut nunanit allaneersut takunissaat qilanaarinerpaavara. Ukiuni taakkunani peqataaffigisartakkanni aamma peqataasarsimasut arlallit ikinngutigillualernikuuakka, Tonny Holm Fisker, Sermitsiaq.AG-mut oqarpoq.
Nammineq rekortini anguniarai
- Kneel jumpimi nammineq rekortera angussallugu neriuutigaara, head pullimi aamma sisamassaanik kuultinnannissannut periarfissaqarpunga, taanna oqaluttuarpoq.
Arctic Winter Gamesernissamut sungiusarneq kisianni tamakkiisimanngilaq.
- Seeqqulunnikuuvunga, kisianni sungiusarsinnaallunga, neriuutigaara tamanna ujaminnannissamut naammakkumaartoq, Tonny Holm Fisker oqarpoq.