U-14-GM: Finalertussat piareerput

Assammik arsarnermi U-14-it pissartanngorniunneranni nukappiaqqani iligiit tallimat tamarmik sisamanik pointeqarlutik unamminerit aallarniutaasut naammassivaat. Taamaasimmat imminnut unamminerit isertittsinerillu najoqqutaralugit inissinneqarput. GSS Nuummeersoq aamma Kâgssagssuk Maniitsumeersoq nukappiaqqani finalessapput niviarsiaqqani NÛK aamma GSS finalertussanngortut.

Nukappiaqqat naligeeqalutik unammisaqattaarput. Arlaannaalluunniit ilaminit siuarnerunnglaq. Allaammi tamarmik sisamariarlutik unammereerlutik tamarmik sisamanik pointeqarput. S-68 Sisimiuneersoq aallartilluaraluarpoq aammalu finalemut anngunnissamut periarfissagissaarluni. Aaqqissuisulli Kâgssagssuk Maniitsumeersoq sukataarluarput taamalu unamminermi kingullermi aalajangiisumi 29-17-mik ajugaanermikkut finalemut anngupput tassani GSS Nuummeersoq unammisussanngorlugu.

Siumut oqaatigiuminaatsut

Niviarsiaqqani NÛK Nuummeersoq tamanit arsarluarneruvoq aammalu unamminerni aallarniutaasuni tallimariarlutik unamminerminni tamatigut ajugaareerlutik finalemut anngullutik. GSS Nuummeersoq aamma Nagdlúnguak Ilulissaneersoq aalajangiisumik arfininngornermi unammipput tassani ajugaasoq finalemut annguttussaalluni. Tassani GSS tassani 22-18-mik ajugaavoq.

Unamminerni aallarniutaasuni NÛK GSS-mut 30-11-mik ajugareernikuugami pissartanngussangatinneqarpoq. Nukappiaqqat unamminerit siumut oqaatigiuminaatsumik ingerlammat GSS-ip aamma Kâgssagssuup finalernissaanni qanorluunniit pisoqarsinnaavoq.

Aajuku arfininngornermi angusat
SAK – Sermeq (niviarsiaqqat) 20-18
Kâgssagssuk – S-68 (nukappiaqqat) 29-17
NÛK – Kâgssagssuk (niviarsiaqqat) 36-9
Nagdúnguak – SAK (nukappiaqqat) 25-15
Nagdlúnguak – GSS (niviarsiaqqat) 18-22
Kâgssagssuk – Sermeq (niviarsiaqqat) 24-15

Aajuku sapaammi unamminissat:
Nal. 13.00 SAK – Sermeq (niviarsiaqqat) 5. – 6.-nngorniunneq
Nal. 14.00 Nagdlúnguak – Kâgssagssuk (niviarsiaqqat) bronzenanniunneq
Nal. 15.00 Nagdlúnguak – S-68 (nukappiaqqat) bronzenanniunneq
Nal. 16.00 NÛK – GSS (niviarsiaqqat) finale
Nal. 17.00 GSS – Kâgssagssuk (nukappiaqqat) finale