Uiloq VM-i aallartimmat nr. 88-iuvoq
Uiloq Slettemarkip nikorfalluni ooqattaasarnermi tallimanik eqquinermigut Pyeong Chang-imi VM ammarlugu unamminermi Kalaallit Nunaata angusaasa pitsaanersaat tunngavilerpaa.
kati Vilhelm Tysklandimeersoq qularutissanngitsumik kukkuneqanngitsumillu ooqattaasarnermigut sukkasuumillu arpannermigut ajugaavoq. VM-imi arpaffik unammiffiusussaq ippassaammat sialummit anorimillu tamarmi aangajalluinnarsimavoq. Sungiusarnerit tamarmik unitsinneqarsimapput, unamminissallu taamaatiinnarneqarnissaa tamarmik naatsorsuutigilereersimagaluarpaat. Aaqqissuisut tungaanniit tupinnaannartumik annertuumik iliuuseqarnikkut arpanneq ingerlanneqarpoq, arpaffikkut aput singerneq tikillugu itissusilikkut qaasersukkullu.
– Uanga pujassaaserfigissaarfiginngilara. Aput "pukaasaq" singernerit tikillugit itissuseqarpoq, tamannalu arpattartunut uattulli oqimaatsunut naleqqutinngivippoq. Kisianni aqqutaa tamaat teknikkiinnavimmik eqqarsarpunga, pujaatsoornerliorneq pivallaarnagu, Uiloq Slettemark oqarpoq.
Nikorfalluni ooqattaasarnermi Uiloq Slettemarkip tallimariarnermi tamaasa eqqorpai.
– Arpattartunit 108-sunit normu 88-inngornera assut naammagisimaarpara. Ilaatigut svenskeq amerikamiorlu tatassimavakka, taakkulu sisoraaserluni oqqattaasartarnermi nunanut pikkorinnernut ilaapput. Apuunnerup kingorna qungujulanersuaq kisimiuvoq, Uiloq Slettemark oqarpoq.
Uiloq Slettemarkip taamaalilluni VM-i ammarlugu ullormi arpaffimmi Kalaallit Nunaata angusaasa pitsaanersaat anguaa.
Øystein Slettemark januaarimi formigissaaleraluarsimasoq World Cupimi Tysklandimi Italiamilu angusarissaarsimagaluartoq arpaffimmi sukkassusissanni angusinnaasimanngilaa aammalu pallorluni ooqattaasarnermi sisamanik uniorsimalluni.
Kalaalllimut inuusuttunnguamut Kristian Kristoffersenimut nunarsuarmi unammisartunik naapitsinera sakkortullunilu misinnarsimavoq. Kristian Kristoffersen ukiumi unammisaqattaarfiusumi napparsimasarluni ingerlalluarsimanngilaq, Junior VM-eqarmallu neriuutigisamminit angusarissaartigisimanani. Kristian Kristoffersen kusanavissumik ooqattaasaraluarpoq, ooqattaasarnerni marluusuni aappaani ataatsimik aappaanilu marlunnik uniorluni, kisianni tassa peqataasunit 123-iusunit normu 109-nngorpoq.
Miillaaraq Lennert Junior VM-ip kingorna qinngami sorluagut aseruuttoorneqarluni uninngasimavoq, taamalu ullormi arpannermit peqajaaniarnani aalajangersimallluni.