Ujakkaarnermi maligassiuilluarsimasoq arfininngornermi nersorniarneqartoq
Ujakkaartartut ataatsimiititsaliaannit timersortartullu allat Hans Rafaelsen kræfteqarluni Danmarkimiittoq eqqarsaatigineqarlunilu nersorniarneqarpoq. Arfininngornermi Maligassiuisut show ingerlanneqarmat, ukiuni 50-ini ujakkaartarnermini maligassiuisimasutut aamma nersorniarneqarluni.
Ujakkaarnerup iluani sunniuteqarnerpaanikoq Hans Rafaelsen maannakkut Danmarkimiippoq katsorsarneqarsinnaanngitsumik kræftimik nappaateqarluni. Ujakkaartartut peqatigiiffianit tusagassiorfitsigut nalunaaruteqarnermi tamanna ilisimatisissutigineqarpoq.
Hans Rafaelsen ukiorpassuarni ujakkaartartuusimavoq, inuusuttunut maligassiuisuullunilu isumassarsisitsisarsimavoq aamma timersortarnerup iluani nammineq piumassutsimik suliaqartarnissamut maligassiuisarsimalluni
- Ujakkaartartut Ataatsimiititaliaani Grønlands Skiforbund ataani Hans Rafaelsen ukiut 50-it sinnerlugit nammineq kajumissutsiminik sulisimaneranut angusarpassuaanullu nasaarfingerujussuarparput, tusagassiorfitsigut nalunaaruteqarlutik allapput.
Hans Rafaelsenip suliarisarsimasa pillugit Maligassiuisut Show Katuami arfininngormat ingerlanneqarmat nersorniarneqarluni oqaaseqarfigineqarpoq.
Inuppassuarnut sunniuteqarsimasoq
Ujakkaartartut ataatsimiititaliaannit inuit ilaat Hans Rafaelsenip ujakkaartartutut sunniuteqarfigisimasai oqaloqatigineqarsimapput.
- Allannitsinni qullipilaarsimavugut ASP-mi sulinermini sunniuteqarluarsimanera annertungaarmat. Hans Rafaelsenip ukiut ingerlaneranni sungiusartarsimasai tamarmik oqaluttuarput sungiusaariaasia ujakkaarnermut kisimi samminngittoq kisiannili inooriatsimut. Uani peqqittumik inuunissaq, qiimasumik aallaaveqarnissaq inoqatinullu ikiuuttarnissaq pineqarluni.
Ujakkaartartoq Martin Møller taakkununnga ilaasoq erseqqissaassuteqarpoq, Hans Rafaelseni tassaasoq nammineq ujakkaartartuunerminut sunniuteqarnerpaasimasoq.
Taamaattussaannartut isigisaminik allanut soqutiginninnera eqqissisimasumik tapersersuisumillu aallaaveqartumik, Martin Møller ataatsimiititaliamut oqaluttuarpoq
Får det bedste frem i andre
Hans Rafaelsenip ilisimaneqaatigaa, sungiusarnerup aallartinnginnerani kaammattuilluni oqalugiartarnini aamma ileqqorissaartuunissaq, aalajangersinnaassuseqarnissaq, inooriaatsimillu sungiusarnermilluunniit pilersaarusiorsinnaassuseqarnissaq klubbimilu ASP-imi ataatsimoorussisinnaalluarnissaq eqqarsaatigalugit.
Peqatigiinnermullu tunniusseqqiisarneq Hansip ASP-mi ukiut 50-t kingulliit sungiusartarsimasaaanut inuiaqatigiinnilu aqutsisunut ingerlaqqissimavoq. Martin Møllerip oqarneratut, Hans Rafaelsenimit ilikkakkani meeqqaminut nammineq ullumikkut sungiusartakkaminut ingerlateqqissimavai.
ASP-imi siulittaasunngorlaap Paneeraq Sandreenip oqaluttuaraa, Hans Rafaelsen nulialu Karen Mina ukiuni kingullerni sulingaatsiarsimasut, tassani ASP-mi nammineq piumassutsimik sulineq annertusarlugu kinguaariit nutaat suliamik ingerlatseqqiinissaat anguniarlugu.
Taassuma erseqqissaassutigaa, Hansip Karen Minallu tapersersuillutik kaammattuillutillu sulinerat patsisaasoq maanna akisussaaffimmik tingusisimanerminut.
- Hans Rafaelsen nulialu Karen Mina Clasen ataqqinaammik annertunerpaamik Ujakkaarnermi Ataatsimiititaliaminngaanniit tunivagut.