Ukaleq ingerlalluareerluni unammisaqattaarnerni taamaatippai
Sisorarluni ooqattaasartartoq Ukaleq Slettemark isumaqarpoq aatsaat taama sungiusarluarsimatigaluni. Unammiuaarnerilli sakkortuut ingerlatereerlugit Norgemi World Cupimi naggataamik unamminissani taamaatiinnarpaa, taamaasillunilu unammiuaarnerit unitsillugit.
Sisoraaserluni ooqattaasartartoq OL-imi peqataasimasoq, Ukaleq Slettemark, Norgemi World Cupimi naggataamik unamminissamut peqataassanani aalajangerpoq. Taamaasilluni sungiusarluartareerluni angusarissaarluareerlunilu ukiuunerani unammisaqattaarnini unitsippai.
- Aasakkut ukiakkullu sungiusarluarsimavunga, napparsimaninni uninngasimagaluarlunga. Aatsaalli taama timikkut nukittutigaanga, Ukaleq Slettemark tusagassiorfinnut nalunaarummi oqarpoq.
Sungiusarluarsimanermini unamminerni angusarissaarpoq, nunarsuarmiullu sinnerinit OL-imi peqataarngaarami immikkut maluginiarneqarluni.
OL-imi peqataanermini individuelimi aamma sprintimi unammeqataasuni tamani ooqattaarfissat 30-iusut uniunngivillugit unammeqataavoq.
- Imminut tatiginera annertuserujussuarpoq, takutiinnarpaalu ooqattaasarnermi sungiusarnert ajunngivissumik ingerlassimagikka, 21-nik ukiulik Ukaleq Slettemark oqarpoq.
Pitsaanerpaajorusuppoq
Ukaleq Slettemark IBU Cupimi 7-itut inissinnini immikkut maluginiarpaa. OL-imilu peqataasimanini ilinniutigalugu tullissaani OL-ertoqarnissaanut peqataanissaminut anguniagaqalereerpoq.
- Sungiusarnerma ineriartornera toqqissisimanaraara. Sungiusarnerami ingerlalluartillugu nunarsuarmi sukkanerpaaniippunga nakernerpaaniillungalu. Nunarsuarmi pitsaanerpaarpaat ilagissagaannga anguniarpara, Ukaleq Slettemark oqarpoq.
Ukaleq Slettemark nunatsinni sisorarnermi pissartanngorniunnerni Sisimiuni aprilimi ingerlanneqartussami peqataanissaminik pilersaaruteqarpoq. Nunatsinniinnermini meeqqat inuusuttullu sisoraaserlutik ooqattaasarnermik soqutigisaqartut naapikkusuppai. Sungiusarnini pisortatigoortumik aallarteqqissavai majimi.