Ukaleq OL-imi unammeqataarngaarnermini kukkuneqanngitsumik ooqattaasarpoq
Sisoraaserluni ooqattaasartartoq Ukaleq Slettemark ukiuunerani OL-imi unammeqataarngaarpoq ullumi ataasinngornermi.
![Ukaleq Slettemark 15 kilometerimut unamminermi 53-issaattut inissippoq.](https://image.sermitsiaq.ag/186071.webp?imageId=186071&width=960&height=642&format=jpg)
20-nik ukiulik Ukaleq Slettemark Kinami Beijingimi ukiuunerani OL-ertoqarnerani unammeqataarngaarpoq ullumi ataasinngornermi.
15 kilometerimut unamminermi 50 minutsit sekundillu 27-t atorpai.
Unammeqataasuni 86-iusuni unammisut marluinnaat kukkunatik ooqattaasarput, taakkulu ilaraat Ukaleq Slettemark.
Ajugaasumit minutsit arfinillit
Unamminermi 20-riarluni igeriarnermini eqqoriakkani tamarmik eqqorpai. Unamminermi 53-iattut inissippoq, OL-imi pissartanngortumit Tysklandimeersumit Denise Herrmannimit minutsit arfinillit sekundillu 14-it arriinnerulluni.
![Ukaleq OL-imi unammeqataarngaarnermini kukkuneqanngitsumik ooqattaasarpoq](https://image.sermitsiaq.ag/352364.webp?imageId=352364&width=960&height=642&format=jpg)
Sprintimut unamminermi tallimanngorpat peqataaqqissaaq. Unammineq Kalaallit Nunaata nalunaaqutaa malillugu 06.00 aallartissaaq. Tassani pitsaanerit 60-it akornaniissinnaaguni 10 kilometerimut unamminermut jagtstartimut anngutissaaq.