Ukiumi timersullammaat Narsami ippassaq nersornaaserneqarput
Kunngit pingasut ulluanni ualikkut Narsap timersortarfiani tallimat missaannik kiattoq timersortartut nersornaaserneqarput.
Sunngiffimmi sammisassaqartitsinermut ingerlatsivik aaqqissuussivoq, kommunalbestyrelsimut ilaasortap Angutitsiaq Isbosethsenip (IA) allagartat tunniuppai, illoqarfimmiullu arlaqartut peqataallutik.
Ukiumi timersullammattut toqqarneqarpoq Ausra K Mortensen, målmanditut piumassuseqartuaannarnini piginnaasaqartuaannarninilu pissutigalugu.
Marie S Inuusutoq ukiup arsaattartuulluarnerpaatut toqqarneqarpoq. Arsarluartuuvoq isiginnaartuniillu nuannarineqartorujussuulluni, aamma mikisunnguugaluarluni angutit utoqqaanerusut unammillerluarsinnaavai.
Ukiumi sungiusaasutsialak tassaavoq Mario Hermansen, meeqqanik inuusuttunillu sungiusaanermi angusaqarluarsimasoq.
Kajunnguaq Stach ukiup holdlederiatut toqqarneqarpoq. Angajoqqaani suleqatigilluarpai meeqqallu malinnaatilluarsinnaallugit. GM-imi aaqqissuussanut arlalinnut peqataasarpoq.