Ukiuunerani OL: Ukaleq ammaanersiornermi peqataassanngilaq
Sisoraaserluni ooqattaasartartup Ukaleq Slettemarkip sungiusarnissani eqqissisimaarnissanilu pingaartillugit, ukiuunerani OL-ip ullumi tallimanngornermi ammaanersiortoqarnissaanut peqataassanngilaq.
Kinami Beijingimi ukiuunerani OL pisortatigoortumik ammarneqassaaq Kalaallit Nunaata nalunaaqutaa malillugu nalunaaqutaq 09.00.
Nunatsinniilli peqataasoq Ukaleq Slettemark ammaanersiornermi peqataassanngilaq.
- Ajoraluartumik ammaanersiornermi peqataassanngilanga, unammisartuullutali Zhangjiakou-mi ammaanersiussaagut unnugu, Sermitsiaq.AG-mut oqarpoq.
Sungiusarnissaq eqqissisimaarnissarlu
OL-imi unammissutsit silamiittussat, ilaatigut soorlu sisoraaserluni ooqattaasaarneq, Yanqingimi aamma Zhangjiakoumi ingerlanneqassapput.
Ukaleq Slettemark pisortatigoortumik ammaanersiornermut peqataasimassasuuguni, katillugit akunnerit arfineq pingasut atorsimassagaluarpai.
- Unammisartut maaniittut amerlanerpaartaat aamma ammaanersiornermut peqataassanngillat. Soorunami peqataalluni nuannersimassagaluaqaaq, taamaattoq sungiusarnissara eqqissisimaarnissaralu pingaartillugu taamatut aalajangerpunga, Ukaleq Slettemark oqarpoq.
Unamminerit
Ukaleq Slettemark marloriarluni pingasoriarluniluunniit OL-imi unammeqataassaaq.
15 kilometerimut unamminermi, sprintimi immaqalu jagtstartimi unammeqataassalluni ilisimatitsivoq.
15 kilometerimut unammineq ataasinngorpat peqataaffigissavaa. Unammineq nunatta nalunaaqutaa malillugu nalunaaqutaq 06.00 aallartissaaq.
Sprintimut peqataanissaa tallimanngornermi februarip 11-ani pissaaq, taanna nunatta nalunaaqutaa malillugu 06.00 aallartissaaq. Jagtstart imaassinnaasoq peqataaffigigaa, taanna februarip 18-ani ingerlanneqassaaq, nalunaaqutaq 06.00-imit.