Qaqqasiorneq
Ukkusissani arpalluni unammisitsineq peqataasunut sakkortooq
Nuuk Mountain Challenge ingerlanneqarmat peqataasunut nalinginnaasumit sakkortuneruvoq, aqqutaami suli aputeqarpoq
Peqataasut niui assoruutsinneqangaatsiarput. Aqqutaami sakkortuvoq, aputeqangaatsiarpormi.
Nuuk Mountain Challenge pingajussaa ingerlanneqarmat nalinginnaasumit sakkortuneruvoq. Ukkusissaq aamma Quassussuaq peqataasunit qaqineqarpoq. Peqataasut nammineq aalajangerpaat tamarmik qaqissanerlugit imaluunniit taakkunani arlaat ataaseq qaqissanerlugu.
Peqataasut ilaasa marluutillugit qaqivaat, katillugit kilometerini arfinilinni qaqqasiorput. Aaqqissuisup Finn Meinelip peqataasut nakkutigeqqissaarpai ajutoortoqannginnissaa anguniarlugu.
Qaqqat qaavini aaqqissueqataasup Morten Nordahl peqataasunut Tuborg Sportsimik giffilinillu sassaalliivoq. Qamuteralannik qummut ingerlanissani naatsorsuutigisimagaluarpaa, aqqullunnerali pissutaalluni Morten Nordahl sassaalliissutissat nassartariaqarsimavai.
Angusat suli saqqummiunneqanngillat.